Намеснік міністра фінансаў РФ Дзмітрый Панкін заявіў аб адсутнасці ўзгодненых тэрмінаў прадастаўлення Беларусі стабкрэдыту на $ 1 млрд.
«Мы ніякіх такіх абяцанняў [па тэрмінах] не давалі», — сказаў Д. Панкін агенцтву «Інтэрфакс». Умовы прадастаўлення крэдыту боку пакуль «фактычна» не абмяркоўвалі, дадаў ён.
«У нас крытэр адзін — дамовіцца па макраэканамічных мерах, гэта можна зрабіць і за тыдзень, а можна і ўсё жыццё не дамаўляцца», — растлумачыў намеснік міністра. Па яго словах, «нам трэба зразумець, што яны збіраюцца ў сябе рабіць з валютным курсам, з бюджэтнымі выдаткамі, стымуляваннем ўнутранай эканомікі».
Пры гэтым ён не змог сказаць, ці паступілі ў Мінфін Расіі прапановы Беларусі адносна макраэканамічных мераў.
Як паведамлялася, згодна з неафіцыйнымі звесткамі, урад Беларусі 31 сакавіка ўвечары перадаў у Мінфін РФ праект праграмы мераў па стабілізацыі макраэканамічнай сітуацыі, узгадненне якіх з урадам РФ з’яўляецца умовай для прадастаўлення расійскага дзяржкрэдыту на $ 1 млрд.
