У Беларусі створана Асацыяцыя забудоўшчыкаў аб'ектаў жыллёвага будаўніцтва 5

У Беларусі створана Асацыяцыя забудоўшчыкаў аб’ектаў жыллёвага будаўніцтва, паведаміў на прэс-канферэнцыі 6 красавіка генеральны дырэктар групы кампаній «Юнівест-М», старшыня савета асацыяцыі Уладзімір Здабноў.

Асацыяцыя была зарэгістравана 3 сакавіка ўпраўленнем юстыцыі Мінгарвыканкама. На гэты час у савет асацыяцыі і ў яе саму ўвайшлі сем вядучых дэвелоперскіх кампаній Беларусі: СТАА «Арэса-Сэрвіс», СТАА «Тамбаз», ААТ «Белбуд», ААТ «10 УНР», група кампаній «Юнівест-М» ЗААТ «Маскоўская інвестыцыйная кампанія», група кампаній «А-100».

Як зазначыў Здабноў, «зараз кожны забудоўшчык у сваёй працы сутыкаецца з шэрагам праблем, якія не знаходзяць належнага тлумачэння ў нарматыўна-прававых актах. Гэта адносіцца да такіх кірункаў, як арганізацыя фінансавання будаўніцтва, страхаванне будаўніцтва, будаўніцтва аб’ектаў інжынернай, транспартнай, сацыяльнай інфраструктуры, знос сядзібнай забудовы і да т.п.».

Паводле слоў старшыні савета асацыяцыі, «стварэнне асацыяцыі забудоўшчыкаў абумоўлена неабходнасцю павышэння эфектыўнасці ў працы забудоўшчыкаў жылля і развіцця прыватна-дзяржаўнага партнёрства ў сферы заканадаўчага рэгулявання сферы жыллёвага будаўніцтва».

Асацыяцыя плануе ўзяць удзел у распрацоўцы нарматыўных прававых актаў, што рэгулююць дзейнасць забудоўшчыкаў «для павышэння эфектыўнасці іх дзейнасці і зніжэння сабекошту аб’ектаў жыллёвага будаўніцтва і павышэнне інвестыцыйнай прыцягальнасці сферы жыллёвага будаўніцтва».

Здабноў паведаміў, што члены савета ўжо сустрэліся з віцэ-прэм’ерам Беларусі Анатолем Калініным, якому перададзены спіс праблемных пытанняў, з якімі сутыкаюцца забудоўшчыкі жылля. Таксама адбылася сустрэча з міністрам архітэктуры і будаўніцтва Анатолем Нічкасавым.

Паводле слоў Здабнова, асацыяцыя «адкрытая для прыёму забудоўшчыкаў з усіх рэгіёнаў Беларусі».

Марына Носава, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ