10.04.2011 / 09:27

У Мінску прайшоў V з’езд «Моладзі БНФ» 6

Маладзёжная камісія Партыі БНФ «Моладзь БНФ» на сваім V з’езде, які прайшоў 9 красавіка ў Мінску, вырашыла скасаваць пасаду старшыні арганізацыі і дэлегаваць каардынацыйныя паўнамоцтвы радзе, што будзе збірацца кожны месяц.

У мерапрыемстве ўзялі ўдзел 26 дэлегатаў са сталіцы і рэгіёнаў. Першапачаткова колькасць удзельнікаў мусіла быць 39, але частка дэлегатаў на з’езд не прыехалі. Апрача прадстаўнікоў лакальных суполак «Моладзі БНФ» на сустрэчы прысутнічала кіраўніцтва Партыі БНФ, а таксама госці з украінскага «Нацыянальнага альянсу».

«Шмат хто да нас далучаецца ва ўзросце 27–28 гадоў, і за некалькі год яны не паспяваюць дарасці, каб пачаць рабіць партыйную кар’еру. Таксама шмат хто хоча нейкага драйву і ўступае ў моладзевую арганізацыю — мы не можам чалавека не прыняць і адправіць у партыю», — адзначыў былы намеснік старшыні «Моладзі БНФ», а зараз адзін з прадстаўнікоў рады камісіі Антон Каліноўскі. Але дэлегатамі была адхілена папраўка аб павелічэнні ўзроставага парогу членаў маладзёжнай камісіі Партыі БНФ да 33–35 гадоў.

Дэлегаты амаль аднагалосна прынялі рэзалюцыю «Аб салідарнасці з палітзняволенымі», у якой выказалі «гатоўнасць рабіць усё магчымае для вызвалення палітвязняў, затрыманых беларускай міліцыяй і КДБ і прыцягнутых да крымінальнай адказнасці па сфабрыкаванай справе аб масавых беспарадках 19 снежня». Тэкстам рэзалюцыі «Моладзь БНФ» зацвердзіла, што арганізацыя гатова «аказваць канкрэтную дапамогу ахвярам рэжыму ды іх сем’ям», а таксама «спрыяць прыцягванню да адказнасці ўсіх прадстаўнікоў улады, якія праводзяць рэпрэсіўную палітыку рэжыму».

Удзельнікі з’езда таксама прынялі рэзалюцыю «Рукі прэч ад „Выспы Свабоды“ ў цэнтры Мінску!», у якой патрабуюць «неадкладнага скасавання палітычнага матывавання рашэння аб спыненні арэнды памяшкання», дзе знаходзіцца управа Партыі БНФ. У рэзалюцыі сцвярджаецца, што ўдзельнікі маладзёжнай камісія Партыі БНФ гатовы распачаць «бестэрміновую акцыю негвалтоўнага супраціву», калі арэнда памяшкання не будзе прадоўжана.

0
гад марскі / Адказаць
10.04.2011 / 13:07
Удзельнікі з’езда таксама прынялі рэзалюцыю «Рукі прэч ад „Выспы Свабоды“ ў цэнтры Мінску!», Каструбавата ўсё гэта гучыць і доўга, і занадта геаграфічна - выспа. р-пр-сп-св-тр-нску.
0
valkirija / Адказаць
10.04.2011 / 15:03
«Моладзі БНФ», падпраўце эмблему на сайце, бо яна падобна да дзіцячага коніка!!! Як карабель назавеш, так і паплыве! Не прыйшоў лі час усталёўваць сувязі паміж рознымі маладзёвымі суполкамі? Хоць для пачатку форум у Сецеве. Складаецца ўражанне, што арганізацыі фармуюцца па сацыяльнай прыналежнасці. Чаму акцыя нацболаў па пытанню турэмнай лякарні не была падтрымлена іншымі? Гэта пытанне датычыцца і палітвязьняў. Калі моладзь не пачне кантактаваць і дыскутаваць, будучыні для Беларусі не будзе. 2гад марскі А што ўсё да слэнга звесці? Павінен хоць недзе выкарыстоўвацца шляхетны стыль.
0
МАКВІЛ / Адказаць
10.04.2011 / 15:36
А на ніве ў нас - Новы парасткі йдуць. Маладыя ў свой час - Уладу ў рукі вазьмуць. Заквітнее тады - Ў дабрабыце наш край ! - Прыйдуць шчасьця гады . Божа, сілы ім дай !
Паказаць усе каментары/ 6 /
Каб пакінуць каментар, калі ласка, актывуйце JavaScript у наладах свайго браўзеру