Пра гэта вязень СІЗА КДБ напісаў у трэцім лісце сястры Вользе, якая вярнулася пасля сямі гадоў эміграцыі ў Беларусь — каб быць побач з братам.
Вольга Класкоўская атрымала ўжо трэці ліст ад брата. «Тон ліста стрыманы, больш хвалюецца за ўсіх нас, за родных, за дзяцей, чым за сябе. Піша, што чытае Салжаніцына; аказваецца, нават там ёсць турэмная бібліятэка. Саша ўжо ведае, што судзілішча над ім прызначаны на 11 траўня, і судзіць яго будуць разам са Статкевічам і Усам. На судзе Саша адводзіць ролю паддоследнага — пра гэта прама і піша; дзіўна, што гэтае слова прайшло цэнзуру», — распавяла Вольга Класкоўская.
Атрымала Вольга ліст і Паўла Севярынца, з якім сябруе з 1996 года. Першы ліст. «Павел трымаецца, у лісце намаляваў ўсмешку; піша, што моліцца за ўсіх нас. Хоць мне тут, на волі, маліцца за яго куды прасцей, чым яму за мяне», — кажа Вольга Класкоўская.
