4 мая ў Мінску павінна была адбыцца прэзентацыя даклада Спецыяльнага дакладчыка Камітэта міжнароднага кантролю «Папярэдняя ацэнка падзеяў 19 снежня 2010 года з пункту гледжання правоў чалавека».Мерапрыемства планавалася правесці ў памяшканнях праваабаронцаў «Вясны».
Як паведаміў «НН» адзін з удзельнікаў прэзентацыі, за 20 хвілін да пачатку мерапрыемства ў памяшканні ўварваліся супрацоўнікі міліцыі. Яны забаранілі прысутным, сярод якіх ёсць і замежныя грамадзяне, выходзіць з памяшкання. На той момант там знаходзіліся журналісты і ўдзельнікі прэзентацыі.
Праз некаторы час людзей, якія знаходзіліся ў памяшканні «Вясны», пачалі вывозіць у Першамайскае РУУС. У некаторых адабралі пашпарты.
Вядома, што сярод затрыманых грамадзяне Расіі Люба Захарава, Юрый Джыбладзэ, Ірына Пайкачава, Вікторыя Громава і грамадзянін Украіны Уладзімір Чараміс. Пазней у Паршамайскі РАУС прывезлі кіраўніка Міжнароднай назіральнай місіі, грамадзяніна Расіі, Аліка Мнацаканяна. Яго даставілі ў пастарунак з іншага месца.
Паводле афіцыйнай версіі, у міліцыю прыйшлі звесткі, што ў памяшканне невядомыя ўносілі падазроныя каробкі, таму міліцыя вырашыла праверыць яго на наяўнасць бомбы. Пасля ўстанаўлення асобы затрыманых адпусцілі.