Шаноўныя сябры і паплечнікі!
Дазвольце мне ад імя Партыі БНФ выказаць шчырыя словы ўдзячнасці ўсім ініцыятарам і ўдзельнікам акцыяў салідарнасці з Управай БНФ, якую ўлады спрабуюць пазбавіць памяшкання. Асаблівае значэнне і аўтарытэт для нас мае падтрымка, пра якую заявілі ў калектыўным звароце больш за сто грамадскіх лідараў і маральных аўтарытэтаў, што заклікалі да абароны Управы і запатрабавалі ў чыноўнікаў перагледзіць відавочна палітычнае рашэнне аб адабранні гэтага памяшкання.
Партыя БНФ успрымае велізарную хвалю людской падтрымкі як сведчанне слушнасці сваёй справы.
Штаб-кватэра нашай партыі, славутая і легендарная Сядзіба, з’яўляецца аб’ектам сімвалічным. Няма сумневу, што гэтая сімвалічная значнасць большая за функцыянальную ролю гэтага памяшкання у якасці юрыдычнага адрасу некалькіх грамадскіх і палітычных арганізацыяў.
Але сімвалічнае значэнне не павінна засланяць для нас тое, увасабленнем чаго гэты сімвал з’яўляецца. Беларуская нацыянальная справа – рэальная грамадска-палітычная з’ява. На беларускім нацыянальным адраджэнні рана вешаць ярлык музейнага артэфакту.
І таксама мы запэўніваем усіх сваіх сяброў (і папярэджваем непрыяцеляў): сядзіба Партыі БНФ незалежна ад рашэнняў апеляцыйных інстанцыяў і надалей будзе утульным домам беларушчыны, ласкавым і прыязным асяродкам культурніцкага жыцця, месцам, дзе яднаюцца аднадумцы і гуртуюцца палітычныя паплечнікі.
Сістэма, якая ўсталявалася сёння ў Беларусі, кепская не толькі сваёй недэмакратычнай формай ды амаральным зместам. Надзвычай важна, што гэтая сістэма не мае пад сабой будзь якога ідэйнага грунту, не мае аніякага фундаменту. Менавіта ў сілу сваёй беспрынцыпнасці і ідэалагічнай пустаты сённяшні рэжым і пераўтварыўся ў запаведнік невуцтва і цемрашальства.
Мы – ведаем што робім. Усе мы разам, супольна, у партыях, грамадскія арганізацыях, незалежных выданнях, лакальных культурных ініцыятывах, малых групах самадапамогі і салідарнасці – усе мы разам ствараем нашую Айчыну.
Не будзем забывацца, што беспасярэдняй нагодай да выдалення штаб-кватэры Партыі БНФ з сённяшняй Сядзібы сталася маштабная акцыя салідарнасці з палізняволенымі падчас драматычных падзеяў снежня мінулага года. Тады сотні палітзняволеных атрымалі дапамогу праз працу валанцёраў па адрасе праспект Машэрава, 8 у Мінску. І што яшчэ больш важна – тады была прадэманстраваная магутная чалавечая салідарнасць з кожным пацярпелым ад палітычнага гвалту, салідарнасць з кожным палітзняволеным і рэпрэсаваным, з іх блізкімі і сваякамі.
Хто скажа, што яно таго не каштавала? Калі б нам давялося вярнуцца назад, ведаючы пра будучую пагрозу пазбаўлення партыйнага офісу – мы рабілі б тое самае, у меру нашых магчымасцяў.
Дазвольце яшчэ раз ад імя кіраўніцтва Партыі БНФ выказаць удзячнасць за акцыі салідарнасці з Сядзібай усім удзельнікам калектыўных і прыватных зваротаў у яе абарону, усім ініцыятарам і удзельнікам акцыяў салідарнасці.
