Беларускія эколагі падключыліся да грамадскай кампаніі па бяспецы дзіцячых цацак, якая зараз праходзіць у Расіі, ва Украіне, краінах Каўказа і Цэнтральнай Азіі. У Беларусі яе каардынатарам выступае некамерцыйная ўстанова «Цэнтр экалагічных рашэнняў».

Як паведаміў намеснік дырэктара Цэнтра экалагічных рашэнняў Яўген Лабанаў, вырабленыя ў Беларусі цацкі не выклікаюць апаскі. Аднак праз адкрытую мяжу з Расіяй у краіну могуць трапляць небяспечныя цацкі з іншых краін, напрыклад з рэгіёну Паўднёва-Усходняй Азіі. У такіх цацках часта ўтрымліваюцца таксічныя хімічныя рэчывы: свінец, ртуць, кадмій, фенолы, браміраваныя антыпірэны і інш.

У межах кампаніі эколагі збіраюць подпісы пад зваротам да ўрадаў краін Еўрапейскай эканамічнай камісіі ААН з патрабаваннямі прадухіліць пранікненне на нацыянальныя рынкі дзіцячых цацак, у склад якіх уваходзяць небяспечныя хімічныя рэчывы, устанавіць жорсткі кантроль за іх саставам. Эколагі, перш за ўсё, спадзяюцца дабіцца паляпшэння нацыянальных заканадаўстваў з тым, каб забяспечыць гарантыі бяспекі саставу цацак па хімічных і таксіколага-гігіенічных паказчыках.

«Выкарыстанне вялікай колькасці сінтэтычных матэрыялаў у галінах прамысловасці, што выпускаюць у тым ліку прадукцыю для дзяцей, прывяло да сур’ёзных наступстваў», — зазначаецца ў звароце. Эколагі падкрэсліваюць, што ўзрастае колькасць дзяцей з рознымі хранічнымі захворваннямі (алергія, астма, бранхіт), праблемамі развіцця, эндакрыннымі захворваннямі, такімі як дыябет. Апрача таго, небяспечная дзіцячая прадукцыя вядзе да росту выпадкаў злаякасных новаўтварэнняў, у тым ліку ў дзяцей малодшага ўзросту.

Зварот будзе прадстаўлены на міжнароднай канферэнцыі «Навакольнае асяроддзе для Еўропы», якая пройдзе ў Астане з 21 па 23 верасня.

Лісты падтрымкі кампаніі ад арганізацый прапаноўваецца накіроўваць на адрас lobanow@ecoidea.by да 15 чэрвеня.

Хочаш падзяліцца важнай інфармацыяй ананімна і канфідэнцыйна?