16 чалавек аштрафаваныя за ўдзел у акцыі ў «Брузгах» 5

Суддзі суда Гродзенскага раёна разгледзелі 13 чэрвеня 16 пратаколаў, складзеных у дачыненні да ўдзельнікаў несанкцыянаванага пікета каля пункта пропуску на беларуска-польскай мяжы «Брузгі».

Як паведаміў БелаПАН старшы памочнік пракурора Гродзенскай вобласці Вячаслаў Ігнацік, 15 удзельнікаў акцыі аштрафаваны па артыкуле 23.34 (парушэнне парадку арганізацыі або правядзення масавага мерапрыемства або пікетавання) і 23.4 (непадпарадкаванне законнаму распараджэнню або патрабаванню службовай асобы пры выкананні ёю службовых паўнамоцтваў) Кодэкса аб адміністрацыйных правапарушэннях

на 70–80 базавых велічынь. Гэта складае 2.450.000–2.800.000 рублёў.

Адзін з затрыманых аштрафаваны толькі па арт. 23.4 КоАП на 25 базавых велічынь — 875.000 рублёў.

Як адзначыў Вячаслаў Ігнацік,

большасць з аштрафаваных ужо выплацілі штрафы, каб не быць даўжнікамі і мець магчымасць выязджаць за мяжу.

Ён таксама паведаміў, што па меры заканчэння праверак будуць прымацца рашэнні аб пакаранні іншых затрыманых удзельнікаў акцыі.

Нагадаем, інцыдэнт у «Брузгах» пачаўся 12 чэрвеня ў 18.00 з-за таго, што супрацоўнікі мытні не выпускалі на тэрыторыю Польшчы вадзіцеляў, якія выязджалі туды другі дзень запар. Падставай для такіх дзеянняў сталі рашэнні ўрада аб абмежаванні і забароне вывазу за мяжу аўтамабільнага паліва і шэрагу спажывецкіх тавараў.

Каля 200 вадзіцеляў, якія пратэставалі супраць новых правілаў, перакрылі дарогу на пагранпераходзе. Супакоіць людзей беспаспяхова спрабавалі прыбыўшыя з Гродна старшыня аблвыканкама Сямён Шапіра, кіраўнікі абласных упраўленняў унутраных спраў і дзяржбяспекі, пракуратуры. Дэблакіраваў дарогу міліцэйскі спецназ. Рух быў адноўлены каля 21.00.

Паводле звестак МУС на вечар 13 чэрвеня, за ўдзел у несанкцыянаванай акцыі былі затрыманыя 22 чалавекі.

Вячаслаў Будкевіч, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ