Удзельнікі пікету супраць падвышэння цэнаў мусяць заплаціць міліцыі і «хуткай» 7

Баранавіцкі гарвыканкам дазволіў 16 чэрвеня сацыял-дэмакратам пікет у старым парку, адмовіўшы ў пікетах на плошчы Леніна і каля Дома гандлю «Вясёлка». Дзесяць удзельнікаў пікету будуць ахоўваць пяць міліцыянераў і брыгада хуткай дапамогі.

Як распавёў Intex-press арганізатар пікета Вячаслаў Болбат, іх мэта — выказванне пратэсту ў сувязі з рэзкім паніжэннем узроўню жыцця жыхароў Беларусі ў выніку дэвальвацыі беларускага рубля, павышэння коштаў на тавары і паслугі.

Заяўкі на тры пікеты былі пададзены 27 мая сябрам Беларускай сацыял-дэмакратычнай партыі «Грамада» Вячаславам Болбатам. 16 чэрвеня планавалася правесці пікеты: з 13:00 па 14:00 — у старым парку, з 16:00 па 17:00 — на пляцоўцы каля Дома гандлю «Вясёлка» (вул. Савецкая); з 17.00 да 18.00 — на плошчы Леніна каля фантана. Заяўленая колькасць удзельнікаў — 10 чалавек.

У адказе арганізатару пікетаў за подпісам намесніка старшыні Баранавіцкага гарвыканкама Дзмітрыя Касцюкевіча паведамляецца: «Баранавіцкі гарадскі выканаўчы камітэт вымушаны адмовіць Вам у дазволе на правядзенне масавага мерапрыемства каля ДГ „Вясёлка“ і на плошчы Леніна (каля фантана)». Разам з тым Вячаславу Болбату дазволена з 13:00 да 14:00 правесці пікет у старым парку.

Гэта тлумачыцца тым, што, згодна з рашэннем гарвыканкама № 1497 ад 16.06.2009 са зменамі ад 5.10.2009 года, месцам для правядзення масавых мерапрыемстваў у горадзе з’яўляецца стары парк культуры і адпачынку па вуліцы Камсамольскай.

Як расказаў Вячаслаў Болбат, дазволены пікет магчымы толькі пры выкананні умоваў рашэння гарвыканкама — прысутнасці на мерапрыемстве нараду міліцыі і брыгады хуткай дапамогі. Баранавіцкія сацыял-дэмакраты збіраюцца на гэтых умовах скарыстаць шанцам данесці свае погляды да жыхароў горада і рыхтуюцца да правядзення дазволенага пікета.

«Цяпер мы займаемся заключэннем дамовы і аплатай паслуг медыкаў і міліцыі», — паведаміў арганізатар пікета Вячаслаў Болбат. Па яго словах,

гадзіна дзяжурства машыны хуткай дапамогі з брыгадай медыкаў абыдзецца ў 41 тысячу рублёў. Прысутнасць ажно пяці супрацоўнікаў міліцыі каштуе 81 тысячу рублёў, бо за знаходжанне на пікеце трох афіцэраў міліцыі трэба заплаціць па 17000, а двух супрацоўнікаў патрульна-паставой службы — па 15000 рублёў у гадзіну».

Руслан Равяка, Intex-press

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ