Баранавіцкі гарвыканкам дазволіў 16 чэрвеня сацыял-дэмакратам пікет пратэсту супраць пагаршэння эканамічнай сітуацыі, напісаў сайт «НН» са спасылкай на баранавіцкі «Інтэкс-прэс». Дазволілі з той умовай, што ўдзельнікі аплацяць працу міліцыі і «хуткай». Гадзіна працы шараговага міліцыянта ацэненая ў 15 тысяч рублёў, афіцэра — у 17 тысяч. Простая арыфметыка: памнажаем цану гадзіны работы на 8-гадзінны працоўны дзень і на 22 рабочыя дні ў месяц. І атрымліваем 2 млн 640 тысяч рублёў на шарагоўца і 2 млн 992 тысячы на афіцэра міліцыі ў месяц. Плюс надбаўкі, прэміі і г. д. Не самы благі выходзіць для Баранавіч заробак, нават з улікам дэвальвацыі.

Зрэшты, міліцыя і мусіць добра зарабляць, каб не быць карумпаванай. Вунь дэмакрат Міхаіл Саакашвілі ў Грузіі падняў паліцыянтам заробкі да 1200 даляраў пры сярэднім узроўні каля $350.

Вось толькі ці за тое міліцыя мусіць атрымліваць добрыя грошы, што «пільнуе» дэмакратычныя пікеты, як у нас? Рытарычнае пытанне.
А яшчэ адзін знаёмы мінскі міліцыянер расказваў, што за адно дзяжурства ва «ўзмацненні» (гэта значыць, у часе разгону масавых акцый) афіцэр атрымлівае 500–600 тысяч. Што-што, а сілавыя структуры кіраўніцтва краіны будзе «карміць» да апошняга. З нашай кішэні, дарэчы.

Хочаш падзяліцца важнай інфармацыяй ананімна і канфідэнцыйна?