Пра гэта заявіў сёння Аляксандр Лукашэнка напрэс-канферэнцыі 17 чэрвеня.
«У нас такіх грошай няма, — канстатаваў ён. — Мы можам нагрэбці з золатам, з усім, што ў нас ёсць, 3,5–5 мільярдаў долараў. Я мог рызыкаваць гэтымі грошамі? Не мог. <…> Я ведаю, чаго мне каштавала зліткі скупляць па ўсім свеце, дзесьці штосьці выплаўляць. Сёння ў нас 32 тоны. Вы хочаце, каб я гэтыя 32 тоны, якія прыналежаць ужо нашым дзецям, выкінуў на рынак? Я гэтага не зраблю. Нават калі вы заўтра скажаце: усё — або выкідваеш, або сыходзіш, я сыду. Але я гэтага не зраблю. Гэта той стратэгічны запас, ну, прабачце мяне, на выпадак вайны».
У сваім выступленні ён спачатку абвінаваціў насельніцтва ў тым, што яно сваімі дзеяннямі справакавала крызісную сітуацыю, пачаўшы скупляць валюту, забіраць уклады з банкаў, каб абмяняць на валюту. А калі валюты не хапіла, пабегла скупляць цукар, соль. Тым самым яно справакавала рост цэн, паколькі «попыт падсцёбнуў цану».
Затым прапанаваў вінаваціць ва ўсім яго, а не ўрад і Нацбанк, кіраўніцтва якіх, паводле слоў Аляксандра Лукашэнкі, ён не збіраецца адпраўляць у адстаўку.
У канчатковым выніку заявіў: «Сітуацыя складаная не таму, што хтосьці вінаваты». Паводле яго слоў, з 2007 года кошт газу вырас у 4,1 разу, нафта за апошнія паўтара года падаражэла з 60–70 да 115–120 долараў за барэль, метал, камплектуючыя — у 2–3 разы. «Якая эканоміка гэта вытрымае?» — задаўся пытаннем Лукашэнка.
Насельніцтва ён заклікаў супакоіцца і паабяцаў: «Мы спакойна на працягу некалькіх месяцаў пры адсутнасці ажыятажу і гвалту вырулім на тую вышыню, на якой павінны знаходзіцца для таго, каб, супакоіўшыся, будаваць сваё жыццё».
«Самае галоўнае для людзей: перастаньце бегаць, жывіце спакойна. Я ведаю, што сёння няпроста. Але людзі ж купілі цукар, соль — цяпер прадавайце, выручайце грошы і жывіце на іх. Гэта, калі жорстка пытанне паставіць», — заявіў Лукашэнка.
Насельніцтва ён таксама папярэдзіў: «Долар сёння друкуецца дзень і ноч. Вы яшчэ трапіце ў гэтую пастку з доларам і еўра, зыходзячы з таго, што ў еўразоне і ў свеце адбываецца ў эканоміцы. Таму я вам не раю кідацца на долары і еўра».
