У судзе, які распачаўся 14 чэрвеня, перапынак да 10:00 24 чэрвеня.
Адвакаты Пачобута паведамілі, што суд не задаволіў хадайніцта, каб выклікаць на працэс 10 сведкаў. Сёння заслухалі экспертаў з боку дзяржавы: кіраўніка ідэалагічнага аддзела Гродзенскага аблвыканкама Паўла Скрабко, кіраўніка прэс-цэнтра аблвыканкама Віктара Жалезніковіча і прафесара Гродзенскага дзяржаўнага універсітэта Нікіцевіча.
Адвакаты кажуць, што заўтра ў судзе пачнуцца спрэчкі.
***
23 чэрвеня ў судзе Ленінскага раёна Гродна аднавіўся працэс над журналістам «Газэты выборчай» Андрэем Пачобутам. Суддзя — Віталь Лецка. Працэс закрыты.
Так не змог трапіць на працэс генеральны консул Польшчы ў Гродне Анджэй Хацкевіч. Міліцыя не пусціла яго далей за ўваход у суд. Яны патлумачылі, што працэс закрыты і знаходжанне назіральнікаў не прадугледжана, паведамляе Радыё Свабода
Ля будынка суда знаходзяцца эксперты па справе Пачобута: кіраўнік ідэалагічнага аддзела Гродзенскага аблвыканкама Павал Скрабко і кіраўнік прэс-цэнтра аблвыканкама Віктар Жалезніковіч.
17 чэрвеня Андрэю Пачобуту было наноў выстаўлена абвінавачанне. Артыкулы наконт абразы (368-1) і паклёпу (367-1) адносна прэзідэнта ў ім засталіся, толькі больш як у два разы павялічыўся тэкст. Па першым зь іх прадугледжана пакаранне да двух гадоў зняволення, па другім — ад двух да чатырох гадоў. Падставы пракуратура знайшла ў артыкулах Пачобута ў «Газэце выборчай», у ягонай калонцы на сайце «Беларускі партызан», а таксама ў адным з допісаў у «Жывым журнале».
