29.12.2006 / 15:13

Іншы горад: Чароўнае падарожжа 1

Сёньня а 18‑ай гадзіне, у Нацыянальным мастацкім музэі распачнецца Калядная вечарына.

Сёньня, 29 сьнежня, а 18‑ай гадзіне, у Нацыянальным мастацкім музэі Беларусі распачнецца Калядная выстава. Гэта яшчэ адзін праект фундатараў з «British American Tobacco» такога кшталту ў галоўнай мастацкай скарбніцы краіны. Першым досьведам Калядных імпрэзаў сталі «Зімовыя гульні», выстава‑фээерыя, напярэдадні 2005 году. Нетрадыцыйны фэставы падыход забясьпечыў тады вялікую цікавасьць да гэтае падзеі ў сталічнай публікі, перадусім у дзяцей.

Сёлетняя выстава, як і папярэдняя, аб’ядноўвае хеўру розных творцаў, зьмешвае жанры й віды мастацтва ў вадно: карціны суседзяць з фатаграфіяй, інсталяцыі з лялькамі, скульптура з дызайнам. Гэтым разам тэматычна яны зьнітаваныя ўяўным шпацырам праз усе знаёмыя мясьціны сталіцы нашае Беларусі. Наогул, як на думку стваральнікаў экспазыцыі, Менск ніколі ня быў прастораю казкі. Нібы й ня пішуцца казкі пра наш горад. Дакладней, цяперашняя маладая гэнерацыя хутчэй знойдзе згадкі пра Менск у Конан‑Дойла, Гэнры Мільлера й ўжо пэўна ў «Гары Потэры» Джааны Роўлінг, чым будзе чытаць беларускія тэксты, што складаюць цэлую клясычную бібліятэку рамантычных, казачных і фальклёрных тэкстаў пра наш горад. Таму, новая гэнерацы прапануе сваю, другую ўжо вэрсію беларускае міталёгіі ХХІ стагодзьдзя... На выставе будуць паказаныя творы Ганны Балаш, Аляксандра Ддзямідава, Сьвятланы Даманавай, Андрэя Асташова, Ірэны Гудзіеўскай, Юрыя Круша, Натальлі Вераб’ёвай, Васіля Матусэвіча, Юліі Матусэвіч, Натальлі Піневіч, Ларыс Мілько ды іншых.

Каляды — самы час, каб расчыніць у прадчуваньні цудаў вочы й наставіць вушы, азіруцца, услухацца, вычуць гэтак знаёмы горад па‑іншаму, убачыць Другі Менск.

Выстава працягнецца да 20 студзеня

Сяргей Харэўскі

0
Харэўскі / Адказаць
01.01.2007 / 11:44
Выстава насамрэч файная! І вельмі цікавая для тых, хто хоча й усьміхнуцца й прызадумацца. А яшчэ для тых, у каго ёсьць дзеткі. Выдатная нагода для сямейнага паходу ў галоўны храм мастатцтва! P.S.: Шкада не зьмясьцілі тут карцінак. Была вельмі пекная афіша. Напэўна, некія калдыры зашкодзілі.
Каб пакінуць каментар, калі ласка, актывуйце JavaScript у наладах свайго браўзеру