Жыхар Маладзечна напісаў, як адбываецца падрыхтоўка да «Дажынак» у асобна ўзятым доме.

Жыхары дома ў Маладзечне абураюцца гармідарам у двары.

Жыхары дома ў Маладзечне абураюцца гармідарам у двары.

Пасля дажджу вадой залівае пад'езд.

Пасля дажджу вадой залівае пад'езд.

а таксама кватэры.

Магілёўская кампанія мае добрыя рэкамендацыі ад калегаў.

У рэдакцыю «НН» звярнуўся жыхар Маладзечна, дзе, як вядома, сёлета адбудзецца святкаванне «Дажынак». Ён паскардзіўся на тое, якім чынам адбываецца рамонт аднаго з дамоў. Да ліста ён прыклаў некалькі дзясяткаў фота. Паводле яго словаў, рамонт цягнецца не адзін месяц. З пашпарту аб’екту ж вынікае, што рамонт мусіў пачацца ў лютым і скончыцца праз месяц.

«Дом нумар 54 па вуліцы Вялікі Гасцінец рамантуюць ужо 4-ы месяц. Пакуль яго жыхары атрымліваюць толькі страты. Кожны, нават невялікі дождж выклікае патоп на 2-х паверхах»
— піша ён. Вось як, па яго словах, выглядае працоўны дзень рамонтнікаў: «Кожны дзень, у любы час дня, выходзячы з дому, я назіраю толькі карціну, як рабочыя сядзяць на раскладзеным каля дома смецці і папіваюць піва. Добра, калі яны наогул знаходзяцца на аб'екце, некалькі тыдняў іх не было ні відаць, ні чуваць».

Жыхар дома скардзіцца, што іх двор больш падобны на велізарную звалку, дзе валяецца ўсё — ад жалеззя да старога шыферу.

Далей ён пералічвае страты, якія нібыта панеслі жыхары дома ў часе рамонту. У выніку таго, што рабочыя падпіралі ўваходныя дзверы і не выключалі пры гэтым дамафон, апошні сапсаваўся. А набывалі яго жыхары на ўласныя сродкі.

Пасля моцнага дажджу на трэцім паверсе заліло тры кватэры. Адна з затопленых кватэр у сваю чаргу падтапіла жытло паверхам ніжэй. Акрамя таго, вадой заліло пад’езд, які жыхары дома рамантавалі таксама самастойна.
Абураны мужчына задаецца пытаннем, хто будзе кампенсаваць нанесеную шкоду.

У інфармацыйным аддзеле будаўнічай фірмы «Сервіс Тэк Кампанія» (Магілёў), якая займаецца рамонтам дома №54, карэспандэнту «НН» спачатку параілі патэлефанаваць праз гадзіну, каб пачуць каментар дырэктара. Праз гадзіну адказалі, што кіраўніцтва, на жаль, адсутнічае.

І дадалі, што па іх звестках, на азначаным аб’екце ў Маладзечна ў кампаніі ніякіх сур’ёзных праблем не зафіксавана.
Мы перадалі прэтэнзіі жыхароў дома ў Маладзечне кіраўніцтву «Сервіс Тэк Кампанія».

***

Магілёўская будаўнічая фірма «Сервіс Тэк Кампанія» працуе па ўсёй тэрыторыі Беларусі. На яе сайце размешчаныя рэкамендацыйныя і ўхвальныя лісты ад Магілёўскага будаўнічага трэсту №12, Упраўлення камунальных прадпрыемстваў Магілёва і таксама калегаў-прыватнікаў.

Хочаш падзяліцца важнай інфармацыяй ананімна і канфідэнцыйна?