Нават у храме сёньня Лукашэнка гаварыў пра энэрганосьбіты.
Гэту прамову можна разьбіраць па костачках, там шмат адметных пасажаў (напрыклад, пра сьвятую незалежнасьць, у якую беларусаў, аднак, "выкінулі" з Савецкага Саюзу). Зрэшты, зірнеце самі.
Адзначу толькі новы піяраўскі рэфрэн: нам шкодзяць праз зайздрасьць.
Каб сьпічрайтэры былі трохі болей дасьведчаныя ў Бібліі, то маглі б, прыкладам, згадаць клясычную ілюстрацыю зайздрасьці — сюжэт пра Каіна і Авэля.
Прагучала б вытанчана, суладна з абстаноўкай. Занесьлі нож над сінявокай нафтагазавыя Каіны!
Зрэшты, мо' і дарэмна грашу на сьпічрайтэраў. Проста цьвёрды электарат, загартаваны ў традыцыях бальшавіцкага атэізму, мог бы і не дапяць.
Сама ж па сабе вульгарызаваная трактоўка матываў расейскіх элітаў (зайздросьцяць, бадай іх качкі зьелі!..) акурат дапасоўваецца да сялянскага мэнталітэту нашага паспалітага люду. Хіба ў вёсцы той-сёй не пацірае рукі, калі ў багатага суседа карова здохла?
Сапраўды, нашто ўлазіць у гушчар палітычных ды рынкавых матэрыяў? Гэта небясьпечная тэрыторыя. У яйкагаловых апанэнтаў — поўны калчан крытычных стрэлаў. Не ў брыво, а ў вока б'юць рэплікамі пра бясплатны сыр у пастцы, расплату за інтэграцыйныя гульні, няздольнасьць саскочыць зь іголкі энэргетычнага наркотыку…
А так ўсё проста: зайздросьцяць маскоўцы, бадай іх качкі!..
