Апублікаваны план удзельнікаў суполкі «Рэвалюцыі праз сацыяльную сетку» на гэтую сераду. Акцыя адбудзецца. Праўда, не ў зусім звыклы час. Пачатак запланаваны на 13:00.
Мадэратары суполкі заклікаюць людзей прыходзіць на цэнтральныя рынкі сваіх гарадоў. «Прыходзім на рынак, знаходзім закрытыя гандлёвыя кропкі. Спачатку іх будзе нямнога, але некалькі заўсёды можна знайсці. Стаім каля іх, нібыта чакаючы адкрыцця. Праз паўгадзіны акцыя скончаная. Калі ўлады будуць зачыняць рынкі, то збіраемся ля галоўнага ўвахода. У мэтах бяспекі — не хлопаем», — пішуць арганізатары.
«Мы разумеем, што многія ў гэты час знаходзяцца на працы. У выпадку поспеху будзем праводзіць акцыі ў суботы», — лічаць мадэратары суполкі.
Паведамляецца, што арганізатары вядуць перамовы з прадпрымальнікамі, каб яны падтрымалі акцыю. З ініцыятывай прадпрымальніцкага страйку па серадах выступіў нядаўна адзін з лідараў дробных гандляроў Віктар Гарбачоў.
Прыводзіцца таксама спіс рынкаў абласных цэнтраў. Што датычыць раёнаў, то там заклікаюць прыходзіць да найбольшага рэчавага рынку.
Акцыі маўклівых пратэстаў пачаліся 1 чэрвеня. Яны ахапілі не толькі Мінск, але і рэгіёны. На акцыю 22 чэрвеня ў сталіцы выйшла некалькі тысяч чалавек, у абласных цэнтрах было ля тысячы.
Тым не менш, пасля ўжывання ўлады фізічнай сілы супраць дэманстрантаў (арыштаў, збіцця), колькасць удзельнікаў пачала зніжацца. Арганізатары шукалі іншыя варыянты акцый, але выйсці на ранейшы ўзровень больш не атрымлівалася.
У мінулую сераду да Кастрычніцкай плошчы выйшла некалькі соцен чалавек, пры гэтым што Плошча ачэпленай не была.
Дарэчы, 27 ліпеня — гэта Дзень узнаўлення беларускай незалежнасці (1990), але ніякі акцэнт на гэтым рабіцца не будзе.
