Манікюр Калашнікава: прысяга жанчын у войску 41

«Я, грамадзянін Рэспублікі Беларусь, ганарова клянуся быць адданым свайму народу…» — такімі словамі распачынаюць сваю прысягу жаўнеры (ці жаўнеркі?) кантрактніцы ў беларускім войску. На сёння ва Ўзброеных Сілах Беларусі служыць больш за 4 тысячы жанчын. Больш за 400 з іх — афіцэры. Гендарныя стэрэатыпы ў Беларусі пачалі змяняцца і ў вайсковай сферы.

Для прысягі ў прызначаны час шыхтуецца ўвесь склад вайсковай часткі.

Кандыдаткі на званне жаўнера беларускага войска.

На страявы плац выносіцца штандар вайсковай часткі.

Прысяга зачытваецца са зброяй у руках.

Прымае прысягу афіцэр Узброеных Сіл.

Тэкст прысягі - на дзвюх мовах.

«Ганарова клянуся быць адданым свайму народу...»

Прысяга для жанчын-кантрактніц нічым не адрозніваецца ад салдат тэрміновай службы.

Штандар вайсковай часткі.

Нампаліт вайсковай часткі робіць калектыўнае фота.

Жаўнер беларускага войска.

Зброю гэтыя рукі трымаць умеюць.

Здымкі: ліпень 2010 г., в/ч 19293, Барысаў.

Зазвычай жанчын-кантрактніц прыводзяць да прысягі пасля авалодвання імі агульнавайсковымі правіламі — ведання вайсковых статутаў і страявой падрыхтоўкі. У адрозненне ад салдатаў тэрміновай службы, гэта адбываецца не сістэматычна — цягам усяго года пасля афармлення ўсіх дакументаў, звязаных з вайсковай службай па кантракце.

Рытуал прысягі таксама не адрозніваецца ад салдат тэрміновай службы — у прызначаны час на страявым плацу вайсковай часткі шыхтуецца яе асабовы склад, выносіцца дзяржаўны сцяг і штандар часткі, форма вайсковай вопраткі прызначаецца камандзірам часткі. Будучыя жанчыны — абаронцы Айчыны — перад шэрагамі вайскоўцаў зачытваюць тэкст прысягі.

«Я, грамадзянін Рэспублікі Беларусь (прозвішча, імя, імя па-бацьку), ганарова клянуся быць адданым свайму народу, свята выконваць Канстытуцыю Рэспублікі Беларусь, выконваць патрабаванні вайсковых статутаў і загады камандзіраў і начальнікаў».

Клянуся годна выконваць вайсковы доўг, мужна і самааддана абараняць незалежнасць, тэрытарыяльную цэласнасць і канстутыцыйны лад Рэспублікі Беларусь".

У беларускае войска ідуць тыя жанчыны, якія могуць канвертаваць сваю грамадзянскую спецыялізацыю на «вайсковыя рэйкі». Часцей гэта медыкі, юрысты, псіхолагі, журналісты (для іх у вайсковых частках ёсць сфера інфармацыйна-ідэалагічнай працы). У войскі сувязі прымаюць выпускніц Вышэйшага дзяржаўнага каледжа сувязі. Тыя, хто мае дыплом аб вышэйшай адукацыі, пасля афармлення дакументаў і здачы іспытаў атрымліваюць афіцэрскія пагоны.

Нямала выпадкаў, калі дзяўчаты ідуць у войска дзеля заробку. Сярэдні заробак радавога жанчыны-кантрактніцы крыху большы, чым на буйных прамысловых прадпрыемствах. Заробак стабільны, графік нязменны, «казённая» вопратка, ільготнае жыллё, даплаты за нарады і дзяжурства.

Фота і тэкст: Сяргей Гудзілін

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ