Два з пяці пацярпелых у выніку выбуху на помпавай станцыі ў Мінску памерлі

Яны памерлі ад апёкавых траўмаў, астатнія знаходзяцца ў бальніцы, паведамілі ў пракуратуры горада.

Па факце выбуху следчым аддзелам пракуратуры Мінска расследуецца справа на падставе ч. 3 арт. 304 Крымінальнага кодэкса (парушэнне правіл пажарнай бяспекі, якое пацягнула па неасцярожнасці смерць чалавека). Прызначана комплексная выбухова-пажаратэхнічная экспертыза.

Нагадаем, выбух газапаветранай сумесі без наступнага гарэння адбыўся 26 ліпеня ў 9.15 на каналізацыйнай помпавай станцыі № 9 вытворчасці «Мінскачыствод» унітарнага прадпрыемства «Мінскводаканал» (раён праспекта Пераможцаў). Усе пацярпелыя — супрацоўнікі рамонтнай брыгады «Мінскачыствода». З траўмамі рознай цяжкасці яны былі шпіталяваныя.

Прычынай выбуху, як мяркуецца, стала парушэнне правіл тэхнікі бяспекі пры правядзенні рамонтных работ.

Вячаслаў Будкевіч, БелаПАН

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм