Нацбанк увёў у абарачэнне прастакутную манету 7

Нацыянальны банк Рэспублiкi Беларусь 2 верасня ўводзiць у абарачэнне срэбную памятную манету «Iкона Прасвятой Багародзiцы «Казанская» серыi «Праваслаўныя цудатворныя iконы» намiналам 20 рублёў, пробай сплаву 925, масай 31,10 г.

Манета мае прастакутную форму памерам 30,00×45,00 мм. З пярэдняга i адваротнага бакоў — кант, якi выступае па перыметры. Бакавая паверхня манеты з насечкай.

Аверс: у цэнтры — арнамент у выглядзе вiнаграднай лазы, якая сiмвалiзуе Багародзiцу, унутры арнаменту — памятны крыж, што ўстаноўлены на замчышчы ў г. Заслаўi ў сувязi са святкаваннем 1000-годдзя праваслаўнай царквы на Беларусi, i проба сплаву; уверсе — рэльефны вiдарыс Дзяржаўнага герба Рэспублiкi Беларусь i ў два радкi надпiсы: РЭСПУБЛIКА БЕЛАРУСЬ, унiзе — намiнал 20 РУБЛЁЎ, справа ад намiналу — год чаканкi.

Рэверс: у цэнтры — вобраз Прасвятой Багародзiцы «Казанская» (выявы нiмбаў над Багародзiцай i Iсусам Хрыстом, зоркi на адзеннi Багародзiцы, а таксама арнамент па вуглах манеты выкананы золатам); унiзе надпiс: КАЗАНСКАЯ.

Манета адчаканена на манетным двары ТАА «Б. Х. Маерс Кунстпрэгенштальт», Карлсфельд, Германiя, якасцю «пруф», тыражом да 10 000 штук.

Памятная манета, што ўводзiцца ў абарачэнне, з’яўляецца законным плацежным сродкам Рэспублiкi Беларусь, абавязковым да прыёму па намiнальным кошце пры ўсiх вiдах плацяжоў без усялякiх абмежаванняў.

nbrb.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ