Урад Літвы ў сераду прыняў рашэнне аб адмене консульскага збору за нацыянальныя візы для грамадзян Беларусі.
Міністэрства замежных спраў сцвярджае, што гэта дасць магчымасць беларусам падарожнічаць у спрошчаным парадку, будзе стымуляваць працэсы дэмакратызацыі ў Беларусі ды спрыяць умацаванню грамадзянскай супольнасці.
Згодна з пастановай, консульскі збор за разгляд просьбы аб выдачы нацыянальнай візы спаганяцца не будзе. Зараз віза каштуе 60 еўра.
Магчымасць адмяніць збор з’явілася, калі ў мінулым месяцы літоўскі Сейм прыняў папраўкі да Закона аб консульскім зборы, што ўрад можа знізіць збор за візы або наогул не спаганяць яго не толькі на падставе парытэту, але і калі гэта неабходна для ажыццяўлення мэтаў знешняй палітыкі ці нацыянальнай бяспекі.
У гэтым выпадку гаворка ідзе пра магчымасць
не спаганяць збор за доўгатэрміновыя нацыянальныя візы, якія называюцца візамі катэгорыі D.
Яны выдаюцца, калі асоба мае намер прабыць у краіне звыш трох месяцаў за паўгода.
З такой візай абмежаваны час можна наведваць і іншыя краіны Шэнгенскай прасторы.
Бясплатныя візы змогуць атрымліваць студэнты, спартоўцы, журналісты, а таксама іншыя асобы, што працуюць,
але такія візы не будуць выдавацца, калі людзі маюць намер перасякаць мяжу ў турыстычных ці іншых кароткатэрміновых мэтах.У такіх выпадках патрабуецца шэнгенская віза, плату за яе вызначае ЕС. Зараз яна складае 60 еўра.
Літва і Беларусь таксама плануюць у асобным парадку спрасціць перасячэнне мяжы для жыхароў прыгранічных тэрыторый. Гэтая дамоўленасць ужо ратыфікаваная, але яшчэ не скончаныя падрыхтоўчыя працы.
Прэзідэнт Даля Грыбаўскайце ў аўторак сказала, што лібералізацыя візавага рэжыму створыць для беларусаў спрыяльныя ўмовы,
каб «выехаць, параўнаць і выбраць, за дэмакратызацыю сваёй краіны яны ці не».