Артур Клінаў: «Справа мастака Бісмарка цалкам сфабрыкаваная» 4

Беларуская мастацкая супольнасць выступіла ў абарону мастака Віталя Калгіна (творчы псеўданім — Бісмарк), які паводле судовага рашэння павінен прайсці прымусовае лячэнне ў спецыяльнай установе.

Мастак быў абвінавачаны ў бойцы, 25 студзеня 2011 Фрунзенскім судом г. Мінска ён накіраваны на прымусовае лячэнне. 27 ліпеня суддзя Комар зацвердзіла папярэдняе рашэнне. Патрабаваньні мастака аб паўторнай судова-псіхіятрычнай экспертызе ігнаруюцца.

У 1988 годзе Віталю Ражкову быў пастаўлены дыягназ «шызафрэнія», падставай для якога стала яго карціна «Патрыярх», што была выстаўлена ў межах калектыўнага праекта «На Калектарнай».

Як паведамляе інтэрнэт-рэсурс Art Aktivist, «Беларускі мастак-авангардыст Бісмарк, якога памятаюць як Віталя Ражкова (пазней ён змяніў прозвішча — рэд.) , з’яўляецца выбітнейшым прадстаўніком беларускага неафіцыйнага мастацтва 1980-90-х. Мастак са сваім унікальным лёсам, які свядома абраў шлях творчага індывідуалізму: пасля распаду Савецкага Саюза Бісмарк амаль не ўдзельнічаў у калектыўных праектах, здзяйсняючы сваю мастацкую стратэгію праз персанальныя арт-акцыі, як, напрыклад, у Галерэі „Падземка“ у 2007 годзе».

У арт-асяродку Мінска справа Бісмарка атрымала шырокі розгалас. Мастак і пісьменнік Артур Клінаў рыхтуе адмысловы нумар часопісу pARTisan, прысвечаны Калгіну.

Клінаў: «Шырокі грамадскі розгалас гэтай справе мы вырашылі надаць хаця б з пачуцця элементарнай справядлівасці. Відавочна, што справа была цалкам сфабрыкаваная. Чалавек мае нібыта групу па псіхічным захворванні, якую ён атрымаў больш як 20 гадоў таму за сваю мастацкую дзейнасць. Тое, куды яго адпраўляюць — гэта горш, чым турма, бо з турмы выходзяць нармальнымі людзьмі, а ў Гайцюнішках адбудзецца поўнае расчалавечаванне. Там ён будзе сядзець з вар’ятамі, якія здзейснілі цяжкія злачынствы. Я думаю, тут не было палітычнага падтэксту, але ягоная артыстычная пазіцыя шмат каго раздражняе. У такой сітуацыі маўчаць нельга, я лічу».

Радыё «Свабода»

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ