У эканоміі энергарэсурсаў больш актыўны ўдзел павінна прыняць насельніцтва. Такую думку выказаў міністр жыллёва‑камунальнай гаспадаркі Уладзімір Белахвостаў 26 студзеня на прэс‑канферэнцыі ў Мінску.
Ён адзначыў, што за апошнія гады ў Беларусі многае зроблена па зніжэнню энергаспажывання ў жыллёвым фондзе. Шматкватэрныя жылыя дамы (ад 20 кватэр і больш) абсталяваны групавымі лічыльнікамі спажывання цеплавой энергіі і сістэмамі рэгулявання, а таксама вадамерамі. Гэта дало магчымасць знізіць у 2006 годзе спажыванне цеплавой энергіі на 10 працэнтаў у параўнанні з 2003 годам, калі была пачата работа па ўстаноўцы лічыльнікаў.
Паводле слоў Уладзіміра Белахвостава, у жылым фондзе яшчэ ёсць «вялікі рэзерв эканоміі». У прыватнасці, плануецца на працягу года ўвесь шматкватэрны жылы фонд абсталяваць індывідуальнымі лічыльнікамі на ваду. Прынята рашэнне аб тым, што такія лічыльнікі грамадзяне змогуць устанаўліваць у растэрміноўку ‑ прадпрыемствы ЖКГ будуць прыцягваць крэдыты на гэтыя мэты. Міністр нагадаў, што грамадзяне, якія ўстанаўліваюць лічыльнікі за кошт уласных сродкаў, атрымаюць 20‑працэнтную льготу ў аплаце вады.
Практыка паказвае, што расход вады ў кватэрах, абсталяваных лічыльнікамі, зніжаецца ў сярэднім у 2‑3 разы. Гэта дасць магчымасць эканоміць сродкі не толькі насельніцтву (прыкладна да Br20 тыс. у месяц), але і бюджэтныя сродкі, таму што аплата насельніцтвам вады толькі часткова пакрывае яе кошт.
Уладзімір Белахвостаў таксама адзначыў, што абрэвіятура «ЖКГ» набывае новы сэнс: «Жыві як гаспадар». Гэта датычыцца і эканоміі рэсурсаў, і неабходнасці «даць кожнаму дому гаспадара ‑ домакіраўніка». Амаль 83 працэнты кватэр жылога фонду прыватызавана, і грамадзянам неабходна вызначыцца з формай праўлення ў сваім доме, падкрэсліў міністр.
Фота phillumania.narod.ru
