20.10.2011 / 23:51

Апошнія гадзіны жыцця Кадафі: прарыў, труба, куля ў спіну 11

Сталі даступныя відэа, знятыя на мабільнік лівійскімі рэвалюцыянерамі. На месца апошняга боя трапілі журналісты. Гэта дазволіла аднавіць карціну апошняга боя Муамара Кадафі.

На досвітку, перад ранішняй малітвай, каля пятнаццаці грузавікоў выехалі з Сірта ў заходнім кірунку. На іх з аточанага горада спрабавалі вырвацца апошнія атрады дыктатара.

На захад ад горада дарогу ім загарадзіла агнём падраздзяленне партызанаў новага ўрада. Рух грузавікоў спыніўся. На падмогу рэвалюцыянерам прыляцелі французскія ваенныя самалёты. Машыны сталі лёгкай здабычай: падбіты былі ўсе машыны да адной.

Кадафі з рэштай целаахоўнікаў пералескам скіраваўся ў бок галоўнай трасы Сірт-Місрата. Яны знайшлі схованку ў бетонных каналізацыйных трубах, збудаваных для сцёку вады. Але гэта была кепская схованка: рэвалюцыянеры проста расстралялі іх з аўтаматаў з бяспечнай адлегласці.

Інфармацыя пра абставіны, пры якіх кулі трапілі ў самога Кадафі, пакуль разыходзяцца. Паводле адных звестак, адзін з целаахоўнікаў Кадафі крычаў нападнікам: «З намі наш гаспадар, ён паранены, не страляйце». Іншыя кажуць, што, наадварот, адзін з асабістых ахоўнікаў расстраляў палкоўніка ў самы апошні момант. Трэція сцвярджаюць, што сам дыктатар крычаў: «Не страляйце! Што такое?».

На адным з відэа Кадафі яшчэ жывы, хоць і сцякае крывёй. Яго атачыў натоўп, яго тузаюць, чалавек зняў чаравік і таўчэ дыктатара чаравікам — найгоршая для мусульман знявага. На наступным відэа ён ужо нежывы.

Кулі трапілі яму ў ногі, спіну, галаву.

Знаходжанне трупа не разгалошваецца з меркаванняў бяспекі.

Лёс дыктатараў: паўгода таму люд вітаў яго на вуліцах Трыпалі. Сёння той самы люд таптаў партрэты павержанага льва.

0
Лёс дыктатараў / Адказаць
21.10.2011 / 00:52
апошні прытулак каналізацыйная труба...
0
Welcome to Hell! / Адказаць
21.10.2011 / 00:59
ды які з яго леў? Шакал, пры чым стары...
0
Валацуга / Адказаць
21.10.2011 / 01:20
Лёс дыктатараў: паўгода таму люд вітаў яго на вуліцах Трыпалі. ==================================================== А прыкладна 2 гады таму ён з гонарам стаяў каля вечнага агню помніка ў Менску. Памятаю фоты (чы не спадарыні Дарашкевіч?) той падзеі. Стаяў ён, мабыць, і адчуваў сваю веліч і незыблімасьць пазыцыяў. А жыць заставалася ўсяго нічога. Краіна ягоная ўжо была на крок ад выбуху. Аднак цікава, што ўсіх, каго падтрымлівае і з кім хаўрусуе Лукашэнка, чакае хуткі фіналь, крах. Узгадайце: Мілошавіч, той кыргыз Быкыеў (чы як яго?), во Муамар, Чавэс сьмяротна захварэў... Пуціну трэба моцна задумацца....
Паказаць усе каментары/ 11 /
Каб пакінуць каментар, калі ласка, актывуйце JavaScript у наладах свайго браўзеру