29.10.2011 / 10:00

Віталь Кутузаў: Думаю, будзе 1:1 2

У 2001 годзе форвард БАТЭ Віталь Кутузаў перайшоў у склад «Мілана».

Трансфер Віталя Кутузава стаў адным з самых дарагіх у беларускім футболе.

Гэта адбылося пасля сустрэчы клубаў у Кубку УЕФА. Барысаўцы двойчы прайгралі, але нападаючы БАТЭ пакінуў добрыя ўражанні на апенінцаў.

Замацавацца ў складзе зорнага «Мілана» ў Кутузава не атрымалася. Аднак футбаліст абжыўся ў Італіі, пагуляў у многіх добрых клубах.

Цяпер «Мілан» у другі раз прыязджае да БАТЭ. У першай сустрэчы на «Сан-Сіра» гаспадары апынуліся мацней 2:0.

«Наша Ніва»: Віталь, як Вам першая гульня?

Віталь Кутузаў: Змагаліся хлопцы, біліся. Аднак прорва паміж камандамі ўсё ж занадта вялікая.

«НН»: У матчы ў адказ шанцы будуць?

ВК: Канечне, але малыя. Павінна ў адзінае скласціся вельмі многа фактараў, каб БАТЭ перамог. Гэта і шанцаванне, і поўная самааддача, і ўзаемавыручка. Трэба біцца. Але, паўтаруся, клубы аддзяляе вялікая адлегласць. І ў плане арганізацыі, і фінансаў.

«НН»: За каго больш перажывалі? Абе-дзве ж каманды Вам не чужыя.

ВК: Спакойна глядзеў футбол. Канечне, хацелася б, каб перамог слабейшы. Заўсёды падтрымліваю больш слабую каманду.

«НН»: А дзе болей знаёмых засталося?

ВК: У БАТЭ, відаць. Найперш трэнерскі штаб. Што да «Мілана», то там вялікая цякучка кадраў. Хаця знаёмыя ёсць і там. Але блізкіх кантактаў ні з кім не засталося.

«НН»: Летам былі размовы, што Вы маглі вярнуцца ў БАТЭ. На месцы Кежмана сябе не ўяўлялі падчас першай гульні?

ВК: Не, зусім. З канкрэтнай прапановай на мяне ніхто не выходзіў. Калі б нешта было, то можна было гаварыць. А так несур’ёзна. Канечне, мне здаецца, што я б мог дапамагчы БАТЭ.

«НН»: У Італіі ў любові да «Мілана» неяк адбіваецца, што прэзідэнтам клуба з’яўляецца прэм’ер-міністр Італіі Сільвіа Берлусконі?

ВК: Адбіваецца ў тым плане, што гаспадаром клуба з’яўляецца ўплывовы чалавек. Гэта значыць, што нават у эканамічным плане ўсё будзе ў парадку. Я Берлусконі бачыў толькі аднойчы, калі ён наведваў базу. Звычайна прыёмы ладзіліся, калі я быў у стане зборнай. Ён прэзідэнт клуба, што пра яго маглі гаварыць. Канечне, з павагай і асцярожнасцю. Так заўсёды, незалежна ад таго, ці гэта прэм’ер-міністр, ці нехта іншы.

«НН»: Можа, паспрабуеце адгадаць вынік сустрэчы?

ВК: Мне хацелася, каб БАТЭ забіў у Мілане. На жаль, не атрымалася. Веру, што заб’юць у Мінску. Такім чынам, стаўлю на 1:1.

Гутарыў Зміцер Панкавец

0
бумбарашка / Адказаць
29.10.2011 / 15:35
Спадзяюся на ничыю, нашым хлопцам гэта пад силу.
0
Аматар портэра / Адказаць
29.10.2011 / 17:30
Заб'ем i не адзiн.
Каб пакінуць каментар, калі ласка, актывуйце JavaScript у наладах свайго браўзеру