На Плошчу не прыйшоў ніхто, апроч журналістаў і супрацоўнікаў сілавых структур.
На ўчорашняй акцыі было тры чалавекі, сёння — ніводнага. Раней грамадзянская кампанія «Еўрапейская Беларусь» заявіла, што фактычны зрыў учорашняй акцыі можна растлумачыць «тэхнічнымі праблемамі». Маўляў, актывісты проста не дайшлі да Кастрычніцкай, бо іх прэвентыўна затрымалі.
Пры гэтым сёння ў часе анлайн-канферэнцыі на Радыё Свабода прэс-сактарар «Еўрапейскай Беларусі» Аляксандр Атрошчанкаў заявіў, што акцыі будуць праходзіць штодня. Магчыма, у іншым фармаце і не абавязкова на Кастрычніцкай.