«Белнафтахім» заяўляе, што «вымушаны прытрымлівацца агульнасусветных тэндэнцый» 1

Дзяржканцэрн «Белнафтахім» размясціў на сваім сайце каментарый у сувязі з чарговым, сёлета ужо дзясятым, падаражаннем паліва. «У сувязі з тым, што Беларусь з’яўляецца ўдзельнікам міжнароднага рынку, закупляючы нафту і рэалізуючы больш як 60% нафтапрадуктаў, што выпрацоўваюцца, на экспарт на падставе біржавых каціровак, „Белнафтахім“ вымушаны прытрымлівацца агульнасусветных тэндэнцый», — гаворыцца ў паведамленні.

Цана на нафтапрадукты на еўрапейскім рынку, тлумачыць прэс-служба канцэрна, вызначаецца зыходзячы з біржавых каціровак. Зараз біржавыя каціроўкі на дызельнае паліва вышэйшыя за каціроўкі на бензін Аі-95. «А ў такіх еўрапейскіх краінах як Латвія, Польшча, Эстонія, Балгарыя, Венгрыя, Румынія, Вялікабрытанія, Швецыя, Кіпр і інш. цана на аўтазаправачных станцыях на дызельнае паліва вышэйшая, чым на бензін Аі-95», — прыводзіць прыклады «Белнафтахім».

У каментарыі таксама зазначаецца,

што беларускія НПЗ «вырабляюць дызельнае паліва еўрапейскага ўзроўню якасці, што адпавядае экалагічным стандартам Еўра-4 і Еўра-5 з ультранізкім утрыманнем серы,

падкрэсліла прэс-служба». «З улікам еўрапейскіх тэндэнцый канцэрнам „Белнафтахім“ таксама прынята рашэнне аб апераджальным росце рознічных цэн на дызельнае паліва ў параўнанні з цэнамі на высокаактанавы бензін Аі-95 пры рэалізацыі праз АЗС у Беларусі», — гаворыцца ў паведамленні.

Апрача таго, зазначаюць у канцэрне, «рост спекулятыўнага вывазу пераважна дызельнага паліва за межы рэспублікі стварае перадумовы для магчымага дэфіцыту гэтага віду нафтапрадуктаў у краіне (у трэцяй дэкадзе кастрычніка продаж паліва на прыгранічных АЗС у параўнанні з аналагічным леташнім перыядам узрос у 3–6 разоў)».

«Белнафтахім» таксама ўказвае, што «пасля ўстанаўлення адзінага валютнага курсу беларускага рубля дыспарытэт цэн з суседнімі дзяржавамі павялічыўся

(рознічная цана на ДП у Беларусі на 38% ніжэйшая, чым у маскоўскім рэгіёне Расійскай Федэрацыі, на 85% ніжэйшая, чым ва Украіне, у 2,6 разу ніжэйшая, чым у Літве, Латвіі і Польшчы)».

«Вываз за мяжу з мэтай перапродажу нафтапрадуктаў, прызначаных для ўнутранага рынку, негатыўна ўплывае на эфектыўнасць працы нафтаперапрацоўчых заводаў рэспублікі», — падкрэсліваецца ў паведамленні прэс-службы канцэрна.

Як паведамлялася раней, з 10 лістапада бензін у Беларусі падаражэў у сярэднім на 3,5%, дызельнае паліва — на 7%. Літр бензіну Нармаль-80 каштуе зараз 4.900 рублёў (+160, або 3,38%), Аі-92 — 5.150 (+180, або 3,62%), Аі-95 — 5.550 (+190, або 3,54%), дызпаліва — 5.750 (+390, або 7,28%).

Раней кошт паліва павышаўся 3 сакавіка (у сярэднім на 5%), 31 сакавіка (на 10%), 24 мая (на 20%), 7 чэрвеня (на 30%), 21 ліпеня (на 3%), 20 жніўня (на 3%), 14 верасня (на 3%), 1 кастрычніка (на 5%) і 16 кастрычніка (бензін — на 3%, дызпаліва — на 5%). 9 чэрвеня па патрабаванні Аляксандра Лукашэнкі, якое прагучала наступным днём пасля масавай акцыі мінскіх аўтамабілістаў «Стоп-бензін», цэны былі зніжаныя на 13–22%.

З пачатку года Нармаль-80 падаражэў у 2,18 разу (было 2.250 рублёў), Аі-92 — у 1,79 разу (2.870), Аі-95 — у 1,71 разу (3.240), дызпаліва — у 2,23 разу (2.580).

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ