Судовае следства па справе былога камандуючага ВПС Азаронка завяршаецца 4

У працэсе па справе былога камандуючага Ваенна-паветранымі сіламі і войскамі супрацьпаветранай абароны Узброеных сіл Беларусі генерал-маёра Ігара Азаронка завяршаецца судовае следства. Пра гэта БелаПАН паведамілі ў ваеннай калегіі Вярхоўнага суда, якая разглядае справу.

Справа ў дачыненні да Азаронка і нейкага грамадзяніна Расіі А. А. Машкаўцана слухаецца ў судзе з 25 кастрычніка. Працэс праходзіць у закрытым рэжыме.

Нагадаем, Ігар Азаронак абвінавачваецца ва ўчыненні злачынства, прадугледжанага ч. 3 арт. 430 КК (атрыманне хабару ў асабліва буйным памеры) і ч. 2 арт. 295 КК (незаконныя дзеянні адносна боепрыпасаў); Машкаўцан — ч.ч. арт. 16 (саўдзел у злачынстве), ч. 3 арт. 430 (падбухторванне і памаганне ў атрыманні хабару ў асабліва буйным памеры) КК.

Паводле неафіцыйнай інфармацыі, Ігар Азаронак быў затрыманы 20 ці 21 снежня 2010 года. Спачатку ён падазраваўся ва ўчыненні злачынства, прадугледжанага арт. 455 КК (злоўжыванне ўладай, перавышэнне ўлады або бяздзеянне ўлады). Затым яму было выстаўлена абвінавачанне ў атрыманні хабару ў асабліва буйным памеры (ч. 3 арт. 430 КК).

Ад пасады камандуючага ВПС і войскаў СПА Азаронак быў вызвалены ўказам прэзідэнта 11 студзеня 2011 года.

Справа расследавалася галоўным следчым упраўленнем папярэдняга расследавання МУС Беларусі. Што канкрэтна інкрымінуецца былому камандуючаму, не паведамлялася.

Вячаслаў Будкевіч, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ