Новая з'ява, выкліканая інфляцыяй і зніжэннем прыбыткаў насельніцтва: абутковая крама «Мегатоп» прапануе набыць тавары ў растэрміноўку на 6 месяцаў пад 0,01%.
Зімовыя боты, на якія трэба было раней выдаткаваць мільён рублёў, у месяц абыдуцца купцу ў 166 тысяч. Як паведаміла супрацоўніца крамы, ахвотных хапае — каля століка, дзе афармляюцца дамовы, заўсёды нехта ёсць. У растэрміноўку купляюць тыя, для каго выкласці ўсю суму адразу не па кішэні.
Максімальная сума куплі ў растэрміноўку — 7 мільёнаў рублёў. Набыць можна любы тавар, нават хатнія тапкі.
Цэны на абутак у краме такія: зімовыя боты з натуральнай скуры і футра — ад 700 тысяч да 1,2 мільёна рублёў. Натуральная скура і штучнае футра — каля 550 тысяч. Боты са штучнай скуры і футра можна набыць за 400 тысяч.
Валёнкі на мяху каштуюць 650–710 тысяч рублёў.
Кошт хатніх тапак — 80–150 тысяч рублёў. Сумкі (са штучнай скуры) каштуюць 200–300 тысяч. Рамяні — каля 80 тысяч.
Пра растэрміноўкі ў іншых крамах пакуль інфармацыі няма. У адной з такіх крамаў цэны вышэйшыя. Так, цана жаночых ботаў з натуральнай скуры дасягае 2,8 мільёна рублёў, мужчынскіх — 1,5 мільёны. За сумкі з натуральнай скуры давядзецца выкласці ад 900 тысяч да 1,5 мільёна рублёў.
