Нацбал Дзяніс Сахар аштрафаваны на 1 млн рублёў 2

Актывіст аргкамітэта па стварэнні ў Беларусі Нацыянал-бальшавіцкай партыі Дзяніс Сахар аштрафаваны на 30 базавых велічынь (1 млн 50 тыс рублёў).

Пра гэта паведаміў прадстаўнік аргкамітэта Дзмітрый Сіняк.

Паводле яго слоў, Сахар быў затрыманы супрацоўнікамі міліцыі 12 снежня прыкладна ў 7.30 у сябе дома. Доўгі час яго сябры не ведалі, дзе ён знаходзіцца. Ні ва УУС, ні ў судзе Першамайскага раёна Мінска не пацвярджалі яго затрыманне. Аднак як стала вядома, у Першамайскім судзе ўсё ж адбыўся працэс, які завяршыўся штрафам для Сахара за дробнае хуліганства.

Сіняк звязвае затрыманне свайго таварыша з акцыяй нацыянал-бальшавікоў, праведзенай 3 снежня каля будынка Белтэлерадыёкампаніі на вуліцы Макаёнка ў Мінску.

Нагадаем, у гэты дзень трое маладых людзей вылілі на ганак каля цэнтральнага ўваходу ў будынак вядро з локшынай і раскідалі ўлёткі. Ва ўлётках ад імя беларускіх нацыянал-бальшавікоў гаворыцца, што «найпершая задача журналіста — гарантаваць людзям атрыманне праўдзівай інфармацыі шляхам адлюстравання аб’ектыўнай рэчаіснасці». Аўтары ўлёткі нагадваюць, што «пра гэта аб’яўляе прынцып вернасці журналіста аб’ектыўнай рэчаіснасці, адзін з міжнародных прынцыпаў прафесійнай этыкі журналіста, прынятых у Парыжы 20 лістапада 1983 года».

«На жаль, журналістам і супрацоўнікам Белтэлерадыёкампаніі такія прынцыпы ніколі не былі знаёмыя. Беларускае тэлебачанне заўсёды славілася адкрыта замоўленымі, палітычна ангажаванымі рэпартажамі, якія выклікаюць то смех, то здзіўленне. Няўмелы рэбрэндынг назваў тэлеканалаў не змяніў іх сутнасці. Пасля змены шыльды БТ усё так жа і засталося сферычным тэлебачаннем у вакууме. Але хопіць! Ешце самі сваю локшыну, мы хочам атрымліваць праўдзівую інфармацыю пра аб’ектыўную рэчаіснасць!» — гаворыцца ў адозве да БТ.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ