Найлепшыя калядныя зоркі – ў «Re:Public» 3

25 снежня ў 19.00 сталічны клюб «Re:Public» (вул. Прытыцкага, 62) ладзіць каляднае шоу, у якім бяруць удзел не проста зоркі беларускага року, а mega-top-star.

Мяркуйце самі: ну хто не ведае творчага даробку гуртоў «Стары Ольса», «Znich», «Litvin Troll»?

Цымус канцэрта яшчэ і ў тым, што ўсе калектывы прэзентуюць на Каляды істотна абноўленыя праґрамы. Напрыклад, кароль нацыянальнага экстрыму «Znich» зайграе нямала твораў з свайго апошняга гучнага рэлізу — альбома «Мроя» (2011). І акурат адтуль жа чароўная песня «Каляда-калядзіца», якая будзе найлепшай прыкметай такога фэсту нават у металёвай версіі.

А «Стары Ольса» пасьля альбома «Дрыгуля» нібыта і замаўчаў на пару гадоў, але ж праца не спынялася, таму настрой будучага альбома прыхільнікі сярэднявечнай музыкі змогуць адчуць ужо на Каляды.

Ну, а «Litvin Troll», як вядома, гэта папросту абцяжараны «Стары Ольса», бо нямала музыкаў працуюць на абодва калектывы. Песні дэбютнага альбома сталі топ-хітамі многіх плебісцытаў (свае «Пахне чабор», «Дуброва», «Купалінка», міжнародныя «Пан Манэліг», «Breaking The Law»), таму кірунак працы над будучым альбомам можна будзе адчуць таксама на гэтых Калядах.

Вітаўт Мартыненка

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ