Галоўнага доктара лідскай бальніцы двойчы здымалі з пасады 7

Генпракуратура масава праверыла бальніцы па ўсёй Беларусі.

Як паведамілі ў Генеральнай пракуратуры, праверкі праводзяцца паводле шматлікіх скаргаў грамадзянаў. Найперш органы кантролю звяртаюць увагу на арганізацыю працы і матэрыяльна-тэхнічнае абсталяванне аб’ектаў сацыяльнага прызначэння, захаванне санітарна-гігіенічных патрабаванняў і мінімальных сацыяльных стандартаў пры аказанні медыцынскай дапамогі ў цэнтральных раённых бальніцах (ЦРБ). «Па выніках правярання высветлілася, што нарматывы напаўняльнасці палатаў не выконваюцца ў Верхнядзвінскай цэнтральнай раённай бальніцы. Памяшканні Мёрскай цэнтральнай раённай бальніцы не адпавядаюць сучасным патрабаванням — асобныя будынкі падлягаюць зносу,

напаўняльнасць палат хворымі — 7–8 чалавек пры нарматыве не больш за 4 чалавекі», —

удакладняе начальнік аддзелу інфармацыі ды сувязяў з грамадскасцю Генпракуратуры Пётр Кісялёў.

Але найбольшы розгалас мела праверка ў Лідскай ЦРБ.

Пры наяўнасці вольных месцаў у платных палатах пацыентаў размяшчалі ў калідоры. У саміх палатах былі гнілыя вокны, столі працякалі і цвілі ад грыбка.

У кардыялагічным аддзяленні замест 5 пацыентаў у палаце ляжалі па 11 чалавек. Адразу пасля гэтага галоўнага доктара Алега Ціса знялі з пасады, аднак па асабістым рашэнні губернатара вобласці Сямёна Шапіры яго ўзнавілі на пяты дзень пасля звальнення. Генпракуратура падала звесткі пра сітуацыю ў лідскай лякарні ў Адміністрацыю прэзідэнта. У прыёмнай галоўнага доктара ЦРБ паведамілі, што працоўная дамова з Алегам Цісам разарваная, ягонае месца цяпер займае былая намесніца Алена Азарко.

Белсат

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм