17.12.2011 / 13:59

Рымашэўскі прапаноўвае Лукашэнку сцэнар мірнай перадачы ўлады абноўлена; дадаўся рэпартаж 115

Чацвёрты ўстаноўчы з’езд БХД: мінус адзін сустаршыня. Аляксей Шэін узяў самаадвод.

Хрысціянскія дэмакраты выбралі сабе новы лозунг. Фота радыё Свабода.

Віталь Рымашэўскі (злева) і Дзяніс Садоўскі. Фота радыё Свабода.

Беларуская хрысціянская дэмакратыя 17 снежня правяла ўжо чацвёрты ўстаноўчы з’езд. Мінулыя спробы сканчаліся адмовай аб рэгістрацыі ад Міністэрства юстыцыі. Хадэкі не здаюцца — гнуць сваю лінію далей.

Памяшканне зноў было выбранае ДК МТЗ.

Кіраўніцтву БХД неяк атрымалася дамовіцца з упраўляючымі дома культуры, каб зняць чырвона-зялёны сцяг.
Навука іншым партыям і арганізацыям.

У фае памяшкання прадавалі мёд. Часовы павераны ЗША Майкл Скэнлан нават не ўтрымаўся, каб набыць збаночак.

З’явілася новая расцяжка «Народная партыя з хрысціянскім сэрцам». А вось па іншай атрыбутыцы асаблівай розніцы ад мінулых з’ездаў не было, зрэшты, і не мусіла быць.

Нязвыклай была толькі адсутнасць Паўла Севярынца. Як вядома,

рухавік-стваральнік БХД цяпер адбывае пакаранне «хіміяй» у Пружанскім раёне.

Ад Севярынца быў заслуханы відэазварот. Павел, седзячы ў машыне ў бел-чырвона-белым шаліку, заклікаў да байкоту «поўнамаштабнага фарсу», так элегантна ён назваў парламенцкія выбары.

У падобным ключы выступаў і былы кандыдат у прэзідэнты Беларусі Віталь Рымашэўскі, які, сярод іншага, прапанаваў Лукашэнку мірны сцэнар перадачы ўлады.

Ён прадугледжвае вызваленне палітычных зняволеных (у зале віселі партрэты палітвязняў), правядзенне свабодных выбараў і фінансавую дапамогу ад Еўропы для выхаду з крызісу.

Таксама Рымашэўскі даў тлумачэнне свайму лісту, які ён напісаў з СІЗА КДБ Аляксандру Лукашэнку. Сказаў, што гэта быў своеасаблівы кампраміс. Сілавікі такім чынам дабіваліся, каб кандыдат ад БХД назваў Лукашэнку прэзідэнтам.

Не абышлося і без стратаў. Цяпер у БХД засталося тры сустаршыні. Чацвёрты — Аляксей Шэін — папрасіў вызваліць яго ад гэтай пасады.

«Рашэнне прымалася ў малітвах», —
адзначыў Аляксей.

У БХД ён тым не менш застаецца. Пра супярэчнасці Шэіна з некаторымі кіраўнікамі БХД гаварылі яшчэ перад выбарамі, калі ён нават не ўвайшоў у давераныя асобы кандыдата ад сваёй партыі.

У астатнім з’езд праходзіў даволі аператыўна. Гарачых дыскусій на ім не было. Выступы былі кароткімі і інтэнсіўнымі. Галоўнай мэтай застаецца рэгістрацыя, а не ўнутрыпартыйныя пытанні.

Падчас галасавання па сустаршынях за Севярынца не было ніводнага голасу супраць ці тых, хто ўстрымаўся. Па Дзмітруку — шасцёра ўстрымаліся. Двое былі супраць, а яшчэ шасцёра ўстрымаліся па Рымашэўскім.

Усяго на з’ездзе было 108 дэлегатаў.

Было нямала гасцей з-за мяжы. Крыху трапіў у лужу прадстаўнік Расіі, які нешта сказаў пра «саюзную дзяржаву». Дэлегатам тое не спадабалася. Быў экс-кандыдат у прэзідэнты Дзмітрый Ус, якога сустракалі доўгімі апладысментамі. Ус папрасіў далучыцца да яго ініцыятывы па змене выбарчага заканадаўства.

А вось Аляксандр Мілінкевіч, Аляксей Янукевіч ды Юрась Губарэвіч у гэты дзень вырашылі наведаць Паўла Севярынца «на высылцы». Цяжка сказаць, ці гэта выйшла выпадкова, ці не.

У перапынку з’езда прайшлі сустрэчы «Моладзі БХД» (яе сапраўды было нямала) ды «Пенсіянераў БХД».

Скончыўся ж з’езд выступам Лявона Вольскага — у цемры, бо адрубілі электрычнасць.

Хочаш падзяліцца важнай інфармацыяй ананімна і канфідэнцыйна?

Зміцер Панкавец

0
123 / Адказаць
17.12.2011 / 14:08
На думку Рымашэўскага, удзел партыі "БХД" у парламенцкіх выбарах будзе азначаць "здраду тым палітзняволеным, хто зараз знаходзіцца за кратамі, і здраду беларускаму народу". А ўдзел у прэзідэнскіх выбарах 10-ці кандыдатаў не быў здрадай? Толькі наяўнасць палітзняволеных вызначае прымаць удзел у выбарах ці не? Цікавая пацізыя...
0
Хопiць! / Адказаць
17.12.2011 / 14:11
Малайца, Віталь Рымашэўскі!!! Апазiцыя не павiнна маўчаць! Народ мае права пачуць праз 17 год палiтыкаў нашай апазiцыi, замест аднаго клоўна, якi кожны дзень дае гастролi. Хопiць! Апазiцыю - ў парламент, там дзе яна павiнна быць па законе!!!
0
Ромпер Стомпер / Адказаць
17.12.2011 / 14:15
Калі цяперашняя ўлада робіць усё каб адбылася рэвалюцыя то чаму яна не адбываецца? То вы чакаеце пакуль Еўропа не увядзе эканамічныя санкцыі, калі ўводзіць вы чакаеце пакуль сітуацыя насьпее, калі сітуацыя наспявае вы чакаеце покуль выпусьцяць палітвязняў, і ўвесь гэты час вы катаецеся па Еўропе праедаючы грошы выдзяляемые на дэмакратыю ў Беларусі, калі палітвязьняў выпускаюць вы ўжо рыхтуецеся да новых выбараў. І так усё па замкнённым коле, так, што спадар Рымашэўскі вы заткнуліся б!
Паказаць усе каментары/ 115 /
Каб пакінуць каментар, калі ласка, актывуйце JavaScript у наладах свайго браўзеру