26 сьнежня ў магілёўскай ратушы адбылася прэзентацыя старадрука «Часоўнік». Кніга была выдадзена для рэлігійных патрэбаў старавераў у магілёўскай друкарні пры Багаяўленскай царкве блізу 1773 году. Выданне выкупілі з аўкцыёну на грошы сабраныя магілёўцамі талакой.
Паводле гісторыка, супрацоўніка Нацыянальнага архіва Беларусі Змітра Яцкевіча кніга ўнікальная для Беларусі. Такія выданні толькі два. Адно з іх захоўваецца ў Нацыянальнай бібліятэцы, другое ў Навуковай бібліятэцы імя Якуба Коласа. Як зазначае гісторык, дзейнасць магілёўскай брацкай друкарні амаль не даследаваная. У гарадскіх музеях захоўваюцца толькі дзве кнігі гэтай друкарні.
«Друкарня працавала на працягу двухсот гадоў, а вось яе выданняў мы маем адзінкі.Гэтая друкарня больш за ўсіх выдала кірылічных кніг у Беларусі, але мы не маем нават навуковых манаграфій пра яе. Прэзентаваная сёння кніга – гэта вельмі цікавы выпадак кантрафактнага выдання выдрукаванага ўжо ў Расійскай імперыі для старавераў. Брацкая друкарня ў Магілёве такімі выданнямі займалася ад 1701 года.
Можна казаць, што гэта падпольнае выданне.У той час такія выданні былі забароненыя ў Расійскай імперыі. Гэта ўсё надае ўнікальнасць кніжцы. У “Часоўніку” змешчаныя малітвы, якія трэба было выконваць вернікам пагадзінна.
Для старавераў гэта кніга на кожны дзень. Калі сям’я старавера не мела такой кнігі яна павінна была яе перапісаць.Мова кнігі пераважна стараславянская», — зазначае Зміцер Яцкевіч.
Колькі магілёўцаў ахвяравалі грошай на кнігу невядома. Яе цана вядомая — 500 даляраў. Захоўвацца старадрук будзе ў музэі гісторыі Магілёва. Пабачыць і пагартаць кнігу ў канферэнц-залу ратушы прыйшлі больш за пяцьдзясят чалавек. На прэзэнтацыі прысутнічаў і ініцыятар збору сродкаў на старадрук студэнт гістарычнага факультэта Беларускага дзяржаўнага універсітэта Андрэй Радкоў.
«Я не хачу выглядаць дужа пафасным чалавекам, але сэрца мне падказала зрабіць менавіта гэтак. У кніжцы змешчаныя рэлігійныя тэксты старавераў.
У кніжцы — гісторыя пакут старавераў, людзей, якія адстойвалі свае рэлігійныя погляды, адстойвалі права быць вернымі традыцыям.Стараверы вымушаныя былі ўцякаць у наш край і яны зрабілі добры ўнёсак у гісторыю й культуру нашага народа. Яны сталі часткай нас саміх», — зазначае Андрэй Радкоў.
Магілёўскі старадрук другі, які выкупілі талакой з ініцыятывы Андрэя Радкова. Летась дзякуючы яму ў Беларусі засталася метрычная кніга Ішкальдскага касцёла.