02.01.2012 / 21:13

Арэльен Мантаруп перайшоў з «Дынама» Мінск у «Кан»

Кантракт заключаны на 2,5 года.

SM Caen

Экс-абаронца футбольнага мінскага «Дынама» Арэльен Мантаруп афіцыйна перайшоў у французскі «Кан», падпісаўшы кантракт на 2,5 года.

«Я вельмі задаволены, што буду выступаць за „Кан“. Я не хаваў ахвоты вярнуцца ў Заходнюю Еўропу, для мяне гэта новы іспыт», — сказаў на прэс-канферэнцыі Мантаруп.

«Мне падабаецца стыль гульні Арэльена. Гэта энергічны футбаліст, які любіць гуляць у нападзенні.
Я заўсёды патрабую ад крайніх абаронцаў менавіта такой гульні», — цытуе словы галоўнага трэнера «Кана» Франка Дзюма Goals.by са спасылкай на афіцыйны сайт клуба з Нармандыі.

Мантаруп будзе гуляць пад 8-м нумарам.

***

«Кан» (Stade Malherbe Caen) заснаваны ў 1913 г. Гуляе ў вышэйшым французскім дывізіёне, куды выйшаў паўтара года таму; у сезоне 2010–2011 фінішаваў на 15-м месцы. Пасля першага кола сезона 2011–2012 (19 тураў) займае 14-ы радок з 20 баламі (5 перамогаў, 5 нічыіх, 9 паразаў, розніца мячоў 24–29). Чэмпіянат Францыі адновіцца 14 студзеня. «Кан» згуляе з «Рэнам», а 7 студзеня ў Кубку Францыі — з «Труа».

***

Арэльен Мантаруп (нарадзіўся 19 снежня 1985 г.) — выхаванец школы «Рэна». Выступаў за «Дыжон», «Арлеан», «Крэтэй». У 2007—2008 гг. гуляў за аматарскі «Вітрэан».

У лістападзе 2008 г. Арэльен заключыў кантракт з мінскім «Дынама», стаўшы першым французскім гульцом у беларускім першынстве. Згуляў за «Дынама» 57 матчаў, забіў два галы.

nn.by

Каб пакінуць каментар, калі ласка, актывуйце JavaScript у наладах свайго браўзеру