Дачка Арыніча працавала на фірму, у якой «Пінскдрэў» закупляў абсталяванне 8

У ходзе судовага пасяджэння па справе аб пажары на «Пінскдрэве», калі загінулі 14 чалавек, адкрылася цікавая дэталь. У набыцці другой лініі па вытворчасці паліўных гранул менавіта ў нямецкай фірмы «Munch Edestahl GmbH» была зацікаўлена дачка генеральнага дырэктара холдынгу Ларана Арыніча. Пра гэта паведамляе газета «Вечерній Брест».

У момант правядзення тэндару на пастаўку камплекты тэхналагічнага абсталявання яна з’яўлялася афіцыйным прадстаўніком дадзенай фірмы ў Беларусі.

Той факт, што дачка гендырэктара прысутнічала на пасяджэнні тэндарнай камісіі, пацвердзіў Уладзімір Шастакоў, былы галоўны інжынер холдынгу. Але дапытаць у судовым пасяджэнні яе не давялося. Паводле слоў дзяржаўнай абвінаваўцы Ларысы Караневіч, дачка былога гендырэктара знаходзіцца за межамі краіны. Як і яе тата.

Працэс па справе пажару праходзіць у Пінску.

Былы дырэктар СТАА «Пінскдрэў-ДСП» Леанід Логвін абвінавачваецца ў службовай нядбайнасці, былыя галоўныя інжынеры холдынгу і завода ДСП Шастакоў і Ігар Логвін — у парушэнні правілаў пажарнай бяспекі. Абодва Логвіны віну прызнаюць часткова, Шастакоў — адмаўляе.

Сяргей Гезгала

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ