Плюсы крызісу

Праехаўшы з першым за пятнаццаць гадоў турам па ўсім свеце, Леанард Коэн запісаў новы студыйны альбом, якога прыхільнікі чакалі восем гадоў.

Хаця, калі казаць папраўдзе, дык і зусім не чакалі ўвогуле. Калі б не фінансавыя цяжкасці, 77-гадовы Коэн наўрад ці ўсур’ёз бы вярнуўся да музыкі: за прамежак ад 1994 да 2009 Коэн паспеў пажыць у будысцкім манастыры, запісаць два студыйныя альбомы і давягнуць поўнай гармоніі з рэчаіснасцю. А

ў 2009 годзе менеджар Коэна незаўважна пазбавіла яго сродкаў і сышла. Пачаўся працяглы судовы скандал. У заслужанага спевака і паэта амаль не засталося грошай, і, дзеля змагання з асабістым фінансавым крызісам, ён выправіўся ў сусветнае турнэ.

Па выніках свет атрымаў два шыкоўныя канцэртныя альбомы, а таксама дыск Old Ideas, які з’явіцца ў продажы 31 студзеня.

Роўная, задуменая пласцінка Коэна выйшла нашмат цікавейшай за папярэднюю

Dear Heather. Песню The Darkness, з нехарактэрным для Коэна блюзавым рытмам, ужо можна смела ўключаць у чарговы Greatest Hits. Туды ж можна адразу ставіць і Show me the Place, і Different Sides, і 7-хвілінную Amen. Гук на альбоме Коэна куды больш цікавы, чым у класічныя 80-я. Дый змест таксама:

любая з яго новых песняў, трапіўшы, напрыклад, на альбом I’m Your Man, сёння б лічылася класікай і ўваходзіла ва ўсе магчымыя кампіляцыі — ад падборак «найлепшага» ў самога Коэна да камерцыйных серый кшталту Romantic Collection.

ЮУ

Хочаш падзяліцца важнай інфармацыяй ананімна і канфідэнцыйна? Пішы ў наш Тэлеграм