23.02.2007 / 10:36

Сяргей Скрабец стварае моладзевы рух 11

Новая моладзевая структура будзе называцца Моладзевым рухам імя Кастуся Каліноўскага. Заплянаваная і першая акцыя гэтага руху – мітынг у падтрымку Аляксандра Казуліна і іншых палітвязьняў.

Новая моладзевая структура будзе называцца Моладзевым рухам імя Кастуся Каліноўскага. Заплянаваная і першая акцыя гэтага руху – мітынг у падтрымку Аляксандра Казуліна і іншых палітвязьняў. Сёньня спадар Скрабец зьбіраецца зьвярнуцца ў Менскі гарвыканкам з заявай на правядзеньне мітынгу.

Ініцыятарам стварэньня новага моладзевага руху выступіў Сяргей Скрабец, а ўзначальвае Сяргей Галаганюк. Мэту яго арганізацыі спадар Галаганюк тлумачыць гэтак:

Галаганюк: «Мы хочам стварыць альтэрнатыву БРСМ. Канечне, яго можна назваць палітычным моладзевым рухам і ён, натуральна, будзе дэмакратычным».

Новы моладзевы руху носіць імя Кастуся Каліноўскага. Адпаведнай гэтай постаці мае быць і дзейнасьць руху, у тым ліку за межамі Беларусі, кажа сузаснавальнік руху Аляксандар Скрабец:

Скрабец: «Мы хочам, каб людзі выступалі зь пікетамі каля амбасадаў у Маскве, Кіеве, Празе, Варшаве і гэтак далей. Каб у Беларусі спынілася манархічная тыранія».

Паводле стваральнікаў руху імя Кастуся Каліноўскага, колькасьць сябраў арганізацыі ў розных гарадах Беларусі зараз абагульняецца. Большасьць гэтай моладзі ўжо была далучаная да партыяў і рухаў і ўдзельнічала ў палітычных акцыях. Чаму зьявілася патрэба ў новай структуры і чым яна будзе розьніцца ад дзейных тлумачыць Сяргей Галаганюк.

Галаганюк: «Сёньня ўсе арганізацыі трымаюцца нейкіх сваіх ідэяў. Мы бы хацелі праз перамовы злучыць у нашым руху ўсе моладзевыя аб’яднаньні. Бо лебедзя, рака і шчупака ўжо надакучыла бачыць. А будучыня за моладзьдзю».

Паводле спадара Галаганюка, пасьля першай акцыі ў падтрымку палітзьняволеных, мае адбыцца зьезд і рэгістрацыя новых каліноўцаў. Наколькі запатрабаваным сёньня ёсьць новы моладзевы рух гаворыць палітоляг Уладзімер Мацкевіч.

Мацкевіч: «Сёньня ў Беларусі мы маем такі парадокс, што арганізацыі не выконваюць тых функцыяў, дзеля якіх ствараліся. Здавалася б, гэта патрабуе стварэньня новых арганізацыяў. Але ж, калі няма ідэі ‑‑ як і чым яны будуць адрозьнівацца ад старых, то мы і надалей будзе пладзіць тыя ж самыя, ні на што ня здольныя арганізацыі, якія крытыкуем і сёньня. Іншая рэч, што спрабаваць трэба і, калі ёсьць добрая дэбютная ідэя, то можна імкнуцца стварыць нешта такое, што будзе кардынальным чынам розьніцца ад таго, што ёсьць сёньня».

Галіна Абакунчык, «Радыё Свабода»

0
S.A. / Адказаць
23.02.2007 / 10:54
"Мы бы хацелі праз перамовы злучыць у нашым руху ўсе моладзевыя аб’яднаньні." Ха-ха-ха. ..................
0
Unknown / Адказаць
23.02.2007 / 12:01
Скрабец наогул ..... даўно. Яму адпачываць трэба, а ён усе палiтыкам марыць стаць. Раю пачытаць артыкул В. Акудовiча "Яны проста гуляюць (Наконт моладзевага супраціву)" у апошнiм нумары ARCHE.
0
малады / Адказаць
23.02.2007 / 12:10
і сьмех і грэх, чэснае слова. моладзь калі ў які рух і аб'яднаецца, дык ня будзе пытацца ні ў Скрабца ні ў нейкага Галаганюка (хто гэта такі, дарэчы? падкажыце, бо ня ведаю). Зараз, натуральна, зробяць: 1. сайт 2. выпусьцяць прэс-рэліз з вывескай яго на Хартыі / Бел. партызане / інш. варыянт, патрэбнае падкрэсьліць. 3. зладзяць прэс-канфэрэнцыю 4. выпусьцяць яшчэ прэс-рэліз, у якім падвядуць посьпехі ланцуговай рэакцыі сярод моладзі, выкліканай першым прэс-рэлізам 5. выпусьцяць налепкі 6. правядуць прэс-канфэрэнцыю з нагоды выпуску налепак 7. выпусьцяць прэс-рэліз з нагоды прэс-канфэрэнцыі з нагоды выпуску налепак 8 вывесяць інфармацыю на сайт 9. гл. любы з вышэйазначаных пунктаў. Агульнанацыянальны моладзевы рух Імя Кастуся Каліноўскага запрацуе!!! Дыктатуры капец. ----- Каб мяне не прынялі за правакатара, які толькі і можа, што плявузгаць: пра сапраўдны моладзевы рух мы даведаемся тады, калі Свабода напіша пра яго СПРАВЫ, а не пра яго стваральнікаў. Гэты рух, можа, і назвы мець ня будзе - ён пачнецца са справы, а не з заявы.
Паказаць усе каментары/ 11 /
Каб пакінуць каментар, калі ласка, актывуйце JavaScript у наладах свайго браўзеру