16.02.2012 / 16:24

Выйшла кніга У.Валожынскага «Мінск у легендах, міфах і паданнях» 3

У Мінску, у бібліятэцы імя Францішка Багушэвіча, 16 лютага адбылася прэзентацыя новай кнігі Уладзіміра Валожынскага «Мінск у легендах, міфах і паданнях».

Зборнік уключае 100 гісторый з жыцця беларускай сталіцы розных перыядаў і складаецца з трох раздзелаў. Першы ахоплівае адрэзак часу ад з’яўлення Мінска да 1917 года, другі — савецкую эпоху горада, трэці, як выказаўся сам аўтар, — уяўляе «сучасны вулічны фальклор».

«Адна з маіх галоўных задач — прыцягнуць да гэтай тэмы ўвагу спецыялістаў, якія потым змаглі б супаставіць гістарычныя звесткі і вызначыць, якія легенды і міфы маглі б быць праўдай, а якія — выдумкай, — паведаміў Валожынскі. — 

Першыя паданні я пачаў збіраць яшчэ дзевяць гадоў таму. Калі іх набралася больш за 50, я ўсур’ёз задумаўся пра такі зборнік».

Паводле слоў даследчыка, ён працаваў над кнігай тры-чатыры месяцы. Пры гэтым падкрэсліў, што лічыць сябе хутчэй не аўтарам, а складальнікам выдання. Валожынскі паведаміў, што самастойна займаўся пошукам матэрыялаў і іх рэдагаваннем. «Наогул, гэта проста маё хобі. На жыццё я зарабляю іншым — займаюся маркетынгам і збытам прадукцыі. Дарэчы, да кожнай легенды або міфа я рабіў свой каментарый-тлумачэнне, які дапамагае лепш разумець апавяданні і прасочваць іх сувязь з гісторыяй», — сказаў ён.

Гэта яго другая кніга. Першая — «Мінск стары і новы» — выйшла ў 2007 годзе.
Таксама Валожынскі з’яўляецца аўтарам дзейнага з 2003 года сайта www.minsk-old-new.com, прысвечанага беларускай сталіцы.

Купіць выданне можна ва ўсіх буйных кнігарнях Мінска.

Хочаш падзяліцца важнай інфармацыяй ананімна і канфідэнцыйна?

0
Тутэйшы / Адказаць
16.02.2012 / 16:28
А дзе можна набыць?
0
Мікола / Адказаць
16.02.2012 / 16:58
Кніга на расейскай ? Чаму назва па-беларуску ?
0
Зміцер / Адказаць
16.02.2012 / 21:36
У якім выдавецтве выйшла гэтая кніга?
Каб пакінуць каментар, калі ласка, актывуйце JavaScript у наладах свайго браўзеру