Падлетак не ацаніў гуманнасці суда і зноў пайшоў красці

Не ацаніў 17-гадовы навучэнец Валожынскага сельскагаспадарчага прафесійнага ліцэя Павел Ч. гуманнасці суда Мінскай вобласці, які летам 2011 года пашкадаваў хлопца і не адправіў у калонію за крадзяжы.

Не прайшло і паўгода, як Павел зноў паквапіўся на чужое.

Суд Валожынскага раёна 9 лютага прыгаварыў Паўла да аднаго года і шасці месяцаў зняволення ў выхаваўчай калоніі. Толькі непаўналетні ўзрост хлопца па законе не дазволіў суду прызнаць яго рэцыдывістам, бо злачынства навучэнец ліцэя здзейсніў, маючы не знятую і не пагашаную судзімасць за былыя злачынствы.

Першы раз год зняволення Павел атрымаў 17 ліпеня мінулага года.

Тады ў судовым працэсе ў Валожыне было даказана сем эпізодаў крадзяжоў, якія здзейсніў абвінавачаны.

Адвакат не пагадзіўся з прыгаворам раённага суда і накіраваў у Мінскі абласны суд касацыйную скаргу.

Вышэйшая судовая інстанцыя пашкадавала хлопца: усё ж яшчэ непаўналетні, напэўна, добра не ўсведамляе тое, што робіць. У выніку выкананне пакарання было адтэрмінаванае на два гады пры ўмове, што асуджаны будзе добра сябе паводзіць і не здзейсніць новага злачынства.

Павел не апраўдаў чаканняў праваахоўнікаў.

Як было ўстаноўлена 9 лютага ў судзе Валожынскага раёна, хлопец 3 лістапада каля 16 гадзін 30 хвілін ключом, які знайшоў раней на лесвічнай пляцоўцы інтэрната свайго ліцэя, адамкнуў дзверы ў блок з двух пакояў.

Гаспадароў на месцы не было. У шафе аднаго пакоя хлопец знайшоў куртку, а ў яе кішэнях — грошы. 16 тысяч расійскіх рублёў і 50 долараў ЗША. У другім пакоі аказаўся плэер з навушнікамі. І грошы, і плэер Павел забраў сабе.

Валюту памяняў у банку на беларускія рублі. Атрымалася 4 мільёны 908 тысяч. Іх хапіла на два тыдні. На камп’ютарны клуб, Інтэрнэт, прадукты і дарагія падарункі на дзень нараджэння сябра. А плэер, па словах самога абвінавачанага, які цалкам прызнаў сваю віну, ён недзе згубіў. Засталіся толькі навушнікі.

17 лістапада Павел, скарыстаўшыся тым жа ключом, зноў наведаўся ў блок інтэрната. На гэты раз гаспадары аказаліся на месцы і выклікалі міліцыю. Акрамя прызнання і чыстасардэчнага раскаяння, віна хлопца пацвярджаецца паказаннямі пацярпелых і сведкаў.

Павел, акрамя рэальнага зняволення, якое ён атрымаў на гэты раз, павінен кампенсаваць ахвярам свайго злачынства матэрыяльную і маральную шкоду.

Рэгіянальная газета

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ