«Урады Рэспублікі Беларусь, Рэспублікі Казахстан і Расійскай Федэрацыі пацвярджаюць недапушчальнасць выкарыстання мер эканамічнага ціску або прымушэння». Аб гэтым гаворыцца ў сумеснай заяве ўрадаў трох дзяржаў, тэкст якой размешчаны сёння на афіцыйным сайце беларускага ўрада.
«Дзейнічаючы ў духу агульнага падыходу, узгодненага кіраўнікамі дзяржаў Рэспублікі Беларусь, Рэспублікі Казахстан і Расійскай Федэрацыі, а таксама з улікам неаднаразовых заяў ЗША і Еўрапейскага саюза аб магчымасці прымянення эканамічных абмежаванняў да адной з дзяржаў — членаў Мытнага саюза/Адзінай эканамічнай прасторы, урады Рэспублікі Беларусь, Рэспублікі Казахстан і Расійскай Федэрацыі пацвярджаюць недапушчальнасць выкарыстання мер эканамічнага націску або прымушэння», — адзначаецца ў заяве.
Такія меры ствараюць штучныя бар’еры ў гандлі, неабгрунтаваныя перашкоды эканамічнаму ўзаемадзеянню суб’ектаў гаспадарання на тэрыторыі Мытнага саюза/Адзінай эканамічнай прасторы, ушчамляюць законныя інтарэсы эканамічнай бяспекі дзяржаў, што звязана з нанясеннем урону плённаму ўзаемавыгаднаму супрацоўніцтву, развіццю інтэграцыйных працэсаў на еўразійскім кантыненце. Гэта будзе мець негатыўныя вынікі, перш за ўсё для простых грамадзян.
Урады Рэспублікі Беларусь, Рэспублікі Казахстан і Расійскай Федэрацыі цвёрда перакананы, што толькі раўнапраўны і паважлівы дыялог будзе садзейнічаць урэгуляванню міжнародных рознагалоссяў, і выступаюць за адмову ад любых дзеянняў, якія перашкаджаюць такому дыялогу».
Адносна абмежавальных мераў Расспажыўнагляду да беларускага малака, украінскага сыру, малдаўскага віна і грузінскага баржомі ў заяве нічога не гаворыцца. Наступныя заявы ў падтрымку зняволення палітвязняў у Беларусі можна чакаць ад Нікарагуа і Сірыі.
