Першасная прафсаюзная арганізацыя ААТ «Нафтан» ад імя больш чым 12,5 тысячы работнікаў «катэгарычна асуджае заклікі кіраўнікоў асобных апазіцыйных палітычных партый і грамадскіх арганізацый прымяніць эканамічныя санкцыі ў дачыненні да Беларусі і байкатаваць тавары прадпрыемстваў нафтахімічнага комплексу». Пра гэта гаворыцца ў заяве першаснай арганізацыі ААТ «Нафтан» Белхімпрафсаюза, прынятай 21 сакавіка на пасяджэнні прафсаюзнага камітэта і размешчанай на сайце прадпрыемства.

Як падкрэсліваецца ў заяве, Белхімпрафсаюз неаднаразова заяўляў «аб антынароднасці кампаніі байкоту беларускіх тавараў і ўвядзення эканамічных санкцый, якая закране не толькі работнікаў прамысловых прадпрыемстваў, але і настаўнікаў, лекараў, студэнтаў, пенсіянераў, іншых грамадзян, якія маюць патрэбу ў сацыяльнай дзяржаўнай абароне».

«Дзякуючы напружанай і штодзённай працы горадаўтваральнага прадпрыемства ААТ «Нафтан» забяспечваюцца дастойныя ўмовы працы і адпачынку не толькі нашых работнікаў, але і многіх жыхароў горада Наваполацка, вобласці, краіны ў цэлым. Гэта павінны разумець і тыя, хто дазваляе сабе падобныя заявы, — адзначаюць у прафсаюзе. — Аднак 14 сакавіка ў інтэрнэце з'явіўся зварот сустаршыні Рады прадстаўнікоў Народных сходаў Івашкевіча В.А. да ўрадаў еўрапейскіх краін неадкладна ўвесці забарону на куплю і транспарціроўку беларускіх нафтапрадуктаў на свае тэрыторыі».

«З усёй адказнасцю заяўляем, што ў выпадку ўвядзення эканамічных санкцый з боку еўрапейскіх краін, якія пацягнуць за сабой зніжэнне даходаў прадпрыемства, скарачэнне вытворчасцяў і колькасці персаналу і як следства акажуць уплыў на недаатрыманне работнікамі гарантаваных калектыўным дагаворам выплат, мы пакідаем за сабой права, кіруючыся арт. 19 закона «Аб прафесійных саюзах» падаць зыскавую заяву аб кампенсацыі страт, прычыненых работнікам ААТ «Нафтан», да спсп. Івашкевіча, Уса (экс-кандыдат у прэзідэнты Беларусі), Калякіна (старшыня Беларускай партыі левых «Справядлівы свет»), Атрошчанкава (каардынатар грамадзянскай кампаніі «Еўрапейская Беларусь») і іншых «актывістаў», што заклікаюць да ўвядзення санкцый супраць прадпрыемстваў і байкоту беларускіх тавараў», — гаворыцца ў прафсаюзным дакуменце.

Прафсаюзная арганізацыя ААТ «Нафтан» звяртаецца «да членаў грамадскіх арганізацый і палітычных партый, рабочых і служачых, якія не падтрымліваюць антырабочыя і абсурдныя заявы сваіх «лідараў», даць публічную ацэнку іх выказванняў супраць чалавека працы».

Хочаш падзяліцца важнай інфармацыяй ананімна і канфідэнцыйна?