Некалькі тыдняў таму гарадскія ўлады абвясцілі публічны конкурс на назвы станцый трэцяй лініі мінскага метрапалітэна, будаўніцтва якой плануецца пачаць у 2015 годзе.
Актывісты кампаніі «Гавары праўду» прапанавалі мясцовым уладам назваць станцыю метро, што будзе месціцца каля дома (вул. Максіма Танка, 10), дзе жыў Васіль Уладзіміравіч, яго імем.
З гэтай нагоды на сайце «Гавары праўду» была размешчана спецыяльная форма электроннага звароту, поўнасцю адпаведная дзейнаму заканадаўству, да кіраўніцтва Мінгарвыканкама. Любы грамадзянін Беларусі, не выходзячы з дому, мог прагаласаваць за прапанову. Усяго падтрымалі ініцыятыву каля 1000 мінчукоў і жыхароў іншых гарадоў Беларусі.
Таксама сярод жыхароў па вуліцы М. Танка была праведзеная падпісная кампанія, вынікам якой з’явіліся 300 подпісаў. Па словах актывіста Аляксандра Сяргеенкі, людзі ахвотна падпісваліся, ніякіх пытанняў з іх боку не было, бо ўсе добра разумеюць, што ўлады проста здекуюцца з памяці народнага пісьменніка, адрынаючы ўсе ініцыятывы па ўшанаванню імя Васіля Уладзіміравіча.
Але яшчэ
ад лета 2010 года у кампаніі захоўвываліся больш за 36 000 подпісаў грамадзян, якія жадаюць бачыць у Мінску станцыю метро імя Васіля Быкава.
28 сакавіка, сканчаецца тэрмін абвешчанага конкурсу. Удаву Быкава, Ірыну Міхайлаўну, наведаў Уладзімір Някляеў.
Потым ад станцыі метро «Фрунзенская», дзе пільны міліцыянер праверыў металашукальнікам каробкі з подпісамі, Някляеў і іншыя актывісты накіраваліся да Мінгарвыканкама.
Подпісы былі перададзеныя галоўнаму спецыялісту аддзела па рабоце са зваротамі грамадзян Звоніку У.З. Чыноўнік прыняў калектыўную заяву ад грамадзян і паабяцаў давесці яе да кіраўніцтва Мінгарвыканкама.
