Пад патранажам Вацлава Гаўла й рэктара Карлавага ўнівэрсытэту Вацлава Гампла ў Празе адбудзецца адкрыцьцё выставы «Выбар бяз выбару. Беларусь — сакавік 2006».
Настрой сакавіка 2006 г. на выставе перададуць перадусім фатаздымкі Андрэя Лянкевіча й Юліі Дарашкевіч з газэты «Наша Ніва», а таксама чэскага фатографа Якуба Досьпівы з ČTK.
Усе яны здымалі намётавае мястэчка, якое было пастаўлена прадстаўнікамі апазыцыі на Кастрычніцкай плошчы ў цэнтру Менску; фатографы заставаліся на Плошчы, здымаючы да апошняга моманту: калі беларуская міліцыя зруйнавала намётавае мястэчка й адвезла сотні дэманстрантаў да спэцпрымальніка на Акрэсьціна.
Кожны фатаздымак будзе суправаджацца асабістымі нататкамі адной з дэманстрантак — незалежнае беларускае журналісткі Дар’і Касьценкі, якая выклала свае тэксты ў Інтэрнэце з назваю «Сакавіцкія дзёньнікі».
Дар’я распавядае ў дзёньніках аб усіх драматычных падзеях, празь якія сама «прайшла» на плошчы. «Гэтыя радкі пішу 22 сакавіка ў 0.48. За апошнія два дні спала ў цэлым дзьве гадзіны. Перад гадзінаю з паловай мяне адпусьцілі з пункту міліцыі. Да гэтага моманту ня ведаю, дзе мой брат, які нёс ежу людзям, што заставаліся на Плошчы», — гаворыцца ў адным з запісаў. Дзякуючы замежным журналістам тэксты дзёньніку пазьней былі разасланыя па сьвеце. На выставе будуць упершыню прадстаўленыя ў чэскім перакладзе, цалкам будуць надрукаваныя ў каталёгу выставы.
Выставу арганізуюць студэнты Карлавага ўнівэрсытэту пры судзейнічаньні рэктара ўнівэрсытэту Вацлава Гумпла й экс‑презыдэнта Чэскай Рэспублікі Вацлава Гаўла.
Выставу суправаджаюць іншыя імпрэзы. Штосераду на філялягічым факультэце Карлавага ўнівэрсытэту будуць паказвацца дакумэнтальныя стужкі аб Беларусі, пасьля якіх будзе мажлівасьць падыскутаваць з рознымі гасьцямі выставы. Напрыканцы красавіка заплянаваны круглы стол, дзе будуць браць удзел прадстаўнікі палітычных і недзяржаўных сфэраў. Прапаноўваецца разам вырашыць пытаньне, як эфэктыўна дапамагаць дэмакратыі ў Беларусі й якія ёсьць сучасныя абмежаваньні дапамогі ад Чэскае Рэспублікі.
Па закрыцьці выставы ў Празе ўся экспазыцыя пераедзе да гораду Брно, потым — у іншыя гарады Чэхіі й замежжа.
