Пытанне наконт платы за наведванне паліклінікі можа быць прадметам шырокай дыскусіі 3

Пытанне аб увядзенні платы за наведванне паліклінікі ў Беларусі павінен быць прадметам шырокай дыскусіі ў грамадстве, заявіў галоўны тэрапеўт Міністэрства аховы здароўя Вадзім Сушынскі 4 красавіка на прэс-канферэнцыі ў Мінску.

Пры гэтым галоўны тэрапеўт адзначыў, што яму не вядома пра падобныя ініцыятывы з боку Міністэрства аховы здароўя.

Сушынскі таксама паведаміў, што Міністэрства аховы здароўя праводзіць ацэнку, наколькі даступная медыцынская дапамога ва ўсіх рэгіёнах Беларусі. «Ёсць шмат пытанняў па размеркаванні патокаў пацыентаў. Але гэта тыя праблемы, якія, як правіла, вырашаюцца на ўзроўні арганізацый аховы здароўя», — сказаў ён.

Нагадаем, прапанова ўвесці плату за наведванне паліклінікі была выказаная намеснікам прэм’ер-міністра Беларусі Анатолем Тозікам 1 сакавіка на пасяджэнні выніковай калегіі Міністэрства аховы здароўя. Паводле яго меркавання, гэта можа скараціць чэргі ў паліклініках. Як заявіў Тозік, плату за адно наведванне паліклінікі варта ўстанавіць «сімвалічную» — 5 тысяч рублёў.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ