Мазынскі здымае фільм пра беларускую жалезную лэдзі — Палуту Бадунову 1

Рэжысёр Валеры Мазынскі здымае дакументальна-мастацкі фільм пра Палуту Бадунову (1885–1938), аднаго зь лідараў Беларускай партыі сацыялістаў-рэвалюцыянераў ды сябра Рады і Народнага сакратарыята БНР, у якім яна была сакратаром (міністрам) сацыяльнай апекі.

У пачатку 1925 года Бадунова вярнулася ў Беларусь, пераехала ў Гомель, дзе працавала настаўніцай. У верасні 1937 года Бадунова была арыштаваная. 30 лістапада Асобая тройка НКВД БССР вынесла прысуд — 10 гадоў папраўча-працоўных лагераў. 25 траўня 1938 г. прысуджана да вышэйшай меры пакарання. Расстраляная 29 лістапада ў Менску. Рэабілітаваная 21 чэрвеня 1989 г. пастановай Прэзідыума Вярхоўнага Савету СССР з прычыны адсутнасьці складу злачынства.

На галоўную ролю дакументальна-мастацкай кінастужкі рэжысёр запрасіў гомельскую журналістку, чальца БАЖ Ларысу Шчыракову. У кінастужцы здымаюцца таксама грамадскія актывісты з Гомеля.

«Мы далі яму назву «Палута Бадунова — успомніць і не забыць»,

 — кажа Валерый Мазынскі. — З самой назвы вынікае, што гэта забытае імя. Некалі яно было вельмі папулярнае і вядомае. Нават Купала ў сваіх «Тутэйшых» узгадвае яе — «цётка Бадунова таксама едзе на белай кабыле з Смаленску». Але сёння гэтае імя забытае, як многа іншага. Хацелася б гэтую жанчыну, гэтую «жалезную лэдзі» — як яе называюць многія навукоўцы і гісторыкі, якія сёння падымаюць архіўныя дакументы, прыгадаць.

Трэба сказаць, што ідэя зрабіць гэты фільм належыць не мне, а гамельчукам, у прыватнасці — журналістцы і гісторыку Ларысе Шчыраковай. Яна паводле кніжкі Валянціны Лебедзевай і пачала сама здымаць яго. А потым звярнуліся да мяне, відаць, як да больш прафесійнага чалавека, каб я ўлез у гэтую справу і папрацаваў з акторамі, бо ў фільме многа рэканструкцыі.

Значыць, у вашым фільме будуць элемэнты інсцэнізацыі?

Мазынскі: Так, бо дакументаў аб Бадуновай няшмат захавалася. Частка, відаць, была знішчаная. І сёння, мабыць, не ўсё яшчэ адкапана ў архівах. Я не ведаю, калі гэта будзе дазволена. Але тое, што ўжо сёньня ёсьць, гаворыць пра вельмі неардынарную асобу. І ведаеце, сітуацыя з тымі эсэрамі так нагадвае сённяшнюю сітуацыю ў Беларусі… Мне захацелася нейкім чынам зрабіць гэтае параўнанне. Тут такая акалічнасць, што гэтыя сваркі і звадкі, якія вечна пераследуюць нашы палітычныя сілы і розныя групоўкі, аказваецца, былі ва ўсе часы.

Фільм павінен быць закончаны ў траўні. Зараз здымаецца чэшскі эпізод жыцця Бадуновай, будуць таксама здымкі ў Маскве.

Прэм’ера фільма запланавана на другую палову года.

Паводле Радыё Свабода

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ