У Беларусі з 12 красавіка завяршаецца ацяпляльны сезон 2011/2012 года, паведамілі ў дэпартаменце па энергаэфектыўнасці Дзяржстандарту.
Сёння ў дэпартаменце адбылося пасяджэнне рэспубліканскай аператыўнай групы па аптымізацыі рэжымаў цеплазабеспячэння і эканомнага выкарыстання паліва і энергіі.
«У сувязі з прагназаваным рэзкім павышэннем тэмпературы паветра і для выключэння неабгрунтаваных выдаткаў паліўна-энергетычных рэсурсаў рэспубліканская аператыўная група па аптымізацыі рэжымаў цеплазабеспячэння і эканомнага выкарыстання паліва і энергіі прыняла рашэнне аб завяршэнні з 12 красавіка ацяпляльнага перыяду», — адзначылі ў дэпартаменце.
З 12 красавіка рэкамендавана пераводзіць у рэжым прапальвання дзіцячыя дашкольныя, школьныя, лячэбна-прафілактычныя, медыцынскія ўстановы, установы сацыяльнага забеспячэння, музеі, а таксама адключаць сістэмы ацяплення грамадскіх, адміністрацыйных будынкаў, прамысловых прадпрыемстваў і іншых аб’ектаў, жыллёвага фонду, інтэрнатаў, гасцініц.
БелТА
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ