Прысуды Лябедзьку, Калякіну і Атрошчанкаву пакінутыя без зменаў
Віцебскі абласны суд пакінуў без змяненняў прыгаворы лідару Аб’яднанай грамадзянскай партыі (АГП) Анатолю Лябедзьку, лідару партыі левых «Справядлівы свет» Сяргею Калякіну іпрэс-сакратару кампаніі «Еўрапейская Беларусь» Аляксандру Атрошчанкаву.
У ноч з 27 на 28 сакавіка апазіцыйныя палітыкі былі знятыя з цягніка Мінск — Масква ў Оршы. Яны накіроўваліся ў Маскву, каб адтуль вылецець у Брусель, дзе ў іх былі запланаваныя сустрэчы з прадстаўнікамі ЕС. Суд, які адбыўся ў Оршы 29 сакавіка, прызнаў палітыкаў вінаватымі ў дробным хуліганстве па арт. 17.1 Кодэкса аб адміністрацыйных правапарушэннях і аштрафаваў кожнага на 350 тыс. рублёў. Увесь час да суда апазіцыянеры правялі ў мясцовым ізалятары часовага ўтрымання. Пры затрыманні ў палітыкаў адабралі пашпарты і пасля суда не вярнулі. Лябедзька, Калякін і Атрошчанкаў напісалі заявы аб распачынанні крымінальнай справы па факце крадзяжу пашпартоў, а таксама касацыйныя скаргі на затрыманне і прыгавор Аршанскага суда ў Віцебскі абласны суд.
«Рашэнне прадказальнае, і я не спадзяваўся ні на што іншае, — заявіў БелаПАН Атрошчанкаў. — Зразумела, што ніякага незалежнага суда ў нас няма. Нават да разгляду нашай касацыйнай скаргі, гэта значыць да ўваходжання прыгавору ў сілу, нас уключылі ў спіс невыязных з Беларусі, у чым я пераканаўся, калі 11 красавіка мяне зноў знялі з цягніка, на якім я ехаў у Літву. Я магу толькі чарговы раз адзначыць, што гэта поўная беззаконнасць».
Цяпер чытаюць
Радыёвядучы расказаў пра ўнутраную кухню АНТ — і пра тое, як ператварыўся ў палітвязня3
Каментары