Беларусь: Паставак зброі ў Кот-д'Івуар не было 5

Дзяржаўны ваенна-прамысловы камітэт Беларусі абверг інфармацыю, што з’явілася 19 красавіка ў інтэрнэце, пра тое, што нібыта мелі месца незаконныя пастаўкі краінай зброі ў Кот-д’Івуар.

«З’яўленне ў шэрагу СМІ чарговай дэзінфармацыі пра пастаўкі, якія нібыта мелі месца, зброі з Рэспублікі Беларусь у Кот-д’Івуар, што з’яўляецца парушэннем санкцый ААН, у Дзяржкамваенпраме разглядаюць як элемент наўмыснай дэструктыўнай інфармацыйнай кампаніі, скіраванай на падрыў іміджу нашай дзяржавы, сведчаннем чаму з’яўляецца з’яўленне такіх інфармацыйных „вутак“ з пэўнай перыядычнасцю», — заявіў БелаПАН прадстаўнік Дзяржкамваенпрама па інфармацыі і сувязях з грамадскасцю Уладзімір Лаўранюк.

Паводле яго слоў, «несумленныя аўтары такіх „сенсацый“ забываюць пра тое, што ў пачатку сакавіка 2011 года ААН ужо прыносіла афіцыйныя прабачэнні Рэспубліцы Беларусь за памылковую інфармацыю пра тое, што нібыта мелі месца пастаўкі баявых верталётаў у Кот-д’Івуар у абыход санкцый ААН».

Лаўранюк падкрэсліў, што ўпаўнаважаныя беларускія дзяржаўныя органы, якія ўваходзяць у сістэму экспартнага кантролю, актыўна супрацоўнічаюць у тым ліку і з групай экспертаў па Кот-д’Івуары ў межах выканання палажэнняў адпаведных рэзалюцый Савета бяспекі ААН.

«У сувязі з гэтым, Дзяржкамваенпрам афіцыйна заяўляе, што Беларусь строга выконвае рэзалюцыі ААН, пры гэтым пастаўкі спецыфічных тавараў (работ, паслуг) замежным партнёрам ажыццяўляюцца выключна ў адпаведнасці з нормамі і прынцыпамі міжнароднага права. У Беларусі створана нацыянальная сістэма экспартнага кантролю, якая адпавядае ўсім міжнародным стандартам і выключае магчымасць несанкцыянаваных паставак аб’ектаў экспартнага кантролю, што неаднаразова пацвярджалася, у тым ліку і экспертамі ААН», — заявіў прадстаўнік Дзяржкамваенпрама.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ