Памёр стваральнік фолк-року +фрагменты фільма Марціна Скарсэзэ 2

19 красавіка ў 71-гадовым веку памёр легендарны амерыканскі музыка Леван Хэлм — адзін са стваральнікаў і вакалістаў гурта The Band, аднаго з самых уплывовых у амерыканскай гісторыі.

The Band у пачатку творчага шляху былі гуртом Боба Дзілана, але пры канцы 60-х пусціліся ў вольнае плаванне.

Менавіта тады музыкі выдалі два альбомы, якія сталі класікай рок-музыкі і пачаткам такога кірунку як фолк-рок — Music from the Big Pink і The Band.

Пасля быў выступ на легендарным Вудстоку, яшчэ з сем альбомаў і пагалоўнае захапленне гуртам ад усіх музычных крытыкаў ЗША і Еўропы.

Леван Хэлм быў не проста бубначом, але таксама і вакалістам — менавіта ён спявае дзве галоўныя песні ў гісторыі гурта The Night They Drove Old Dixie Down і The Weight —

на апошнюю зрабілі каверы ўсе больш-менш значныя амерыканскія артысты, што працуюць з фолк-рокам і соулам.

Апошні канцэрт гурта, які адбыўся ў 1976 годзе, здымаў рэжысёр Марцін Скарсэзэ — у выніку фільм «Апошні вальс» стаў сапраўднай класікай канцэртаў на відэа.

Пасля лёс раскідаў удзельнікаў гурта па розных праектах,

Леван Хэлм працягваў запісваць альбомы са сваімі любімымі песнямі, а таксама з каверамі на класічныя творы. Звышпродажаў кружэлкі не дасягалі,

але разбіраліся аматрамі фолк-року.

Ад канца 90-х Леван Хэлм пакутваў ад рака горла і нават перамог яго, пасля чаго запісаў адразу два альбомы і прыдумаў новы від канцэртаў — усе, хто хацеў паслухаць Хэлма і ягоны гурт не ў вялікіх залах, маглі прыехаць да яго дадому ў Вудсток, дзе гурт выступаў раз на тыдзень.

Аднак зусім нядаўна хвароба да Хэлма вярнулася. 19 красавіка музыкі не стала.

Юрась Ускоў

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ