У найбліжэйшы час у Мінску ўпершыню будзе вызначаны самы галасісты салавей, паведаміў БелаПАН каардынатар акцыі «Салаўіныя вечары ў Мінску» Руслан Шайкін.

Паводле яго слоў, акцыю правядуць грамадская арганізацыя «Ахова птушак Бацькаўшчыны» (АПБ) сумесна з Мінскім гарадскім камітэтам прыродных рэсурсаў і аховы навакольнага асяроддзя. Праслухоўванне салаўёў пройдзе з 29 мая па 15 чэрвеня ў месцах найбольшага знаходжання гэтых птушак. Спецыялісты вызначаць лепшага спевака па колькасці і па якасці выканання асобных кален — цэласных куплетаў з песні. Чым больш кален і чым яны чысцейшыя, тым лепшы спявак. Песня-пераможца будзе запісаная і выкладзеная на сайце АПБ.

Як адзначыў Шайкін, сёлета салаўі ў Мінску заспявалі рана — яшчэ ў пачатку мая. Яны спяваюць шмат і разнастайна. Пачуць салаўя можна ў батанічным садзе, заказніку «Лябяжы», у асобных месцах у Лошыцкім парку, у зялёных зонах горада. Усяго ў горадзе налічваецца прыкладна 250 месцаў, дзе спяваюць салаўі.

Вызначэнне лепшага спевака пройдзе ў межах традыцыйнай акцыі па ўліку салаўёў, якая праводзіцца АПБ ужо шосты год. Для ўдзелу ў акцыі неабходна патэлефанаваць па нумары ў Мінску 263-06-13 і паведаміць пра месцы спеваў салаўёў. Абаненты МТС і velcom могуць таксама адправіць інфармацыю аб месцах спевай салаўёў SMS на нумар 0841.

У рамках акцыі АПБ арганізуе назіральныя пляцоўкі, на якіх усе ахвотныя змогуць паслухаць салаўёў і па магчымасці паназіраць за імі. Вечарам 2 чэрвеня такая пляцоўка будзе працаваць у Мінскім заапарку, на наступным тыдні — у Цэнтральным батанічным садзе і Лошыцкім парку. Акрамя знаёмства з салаўём аматары прыроды змогуць пагутарыць са спецыялістамі АПБ, арнітолагамі і валанцёрамі. З дапамогай бінокляў і падзроных труб можна будзе паназіраць і за іншымі відамі птушак. У рамках «Салаўіных вечароў у Мінску» можна будзе паўдзельнічаць у экскурсіях па назіранні за птушкамі.

Па выніках уліку салаўёў будзе складзена «Салаўіная карта Мінска — 2012».

Хочаш падзяліцца важнай інфармацыяй ананімна і канфідэнцыйна?